Серік Абас-шах: "БӘРІ БІРДЕЙ ҚОЛ КӨТЕРЕТІН БОЛСА, ДЕПУТАТТАРДЫ КӨБЕЙТІП КЕРЕГІ НЕ?

Ауылдағы шопыр досым звондайды. Тау жақта күзден бері уақытша тұрып жатқанын, үш-төрт айдан бері барлық жаңалықтан құр қалғанын сампылдап айтуда. Сосын, мылжың сұрақтарын қоя бастады. - Әй, Пәленше. Қазақ мемлекетінің 550 жылдығына дайындық қалай? - Мемлекетіміз хандыққа ауысып кетті. Телефонның ар жағындағы досым қақалып қала жаздады. - Ойбай не дейді? Рас болып шықты ма? - Иттің баласы, жаман ойлама. - Енді не ойлаймын? - Қазақ мемлекетінің емес, Қазақ хандығының 550 жылдығын тойлайтын болдық. - Күзде басқаша сайрап едік қой. - Қазір қыс емес пе? Күн суып кетті. - Солай екен ау... Айтпақшы, 550 жылдыққа арнап, 20 сериялы тарихи фильм түсіреміз деп едіңдер. - 20 серияның жартысы ғана түсіріледі. - Сонда, Қазақ хандығына 275 жыл тола ма? Досымның өстіп күйдіретіні бар. Қатты ашулана жаздап, өзімді ұстадым. - Әй, "сәбәкі", қайдағы 275 жыл? Күзден бері 550 жыл деп сарнап жатқан жоқпыз ба? - Қайдан білейін, үш ай ішінде мемлекеттігіміз хандыққа айналып, сериялар саны екі есе азайып жатыр. Сосын, тарихымыздың жасы екі есе кеміген болар деп шештім. Қарапайым логика. - Тарих емес, мұнай бағасы кеміп жатыр. Бюджет қысқаруда. - Солай демейсің бе? Сериал мен ұяттан басқа тағы не қысқарды? - Ит біліп пе? Бәрін үнемдеуге кірістік. - Е, ақша жетпесе анау, Сенатты қысқартпайсыңдар ма? Мәжілісмен санын 25 басқа азайтыңдар, қазақтарға сол да жетеді. - Депутат саны неге 25 адам болу керек? - Бір класта (сыныпта) 25 оқушы отырмай ма? Бәрі бірдей қол көтере беретін болса, олардың санын көбейтіп қажеті не?