Астанада жоғалған студенттің өлі денесі табылды

Астанада полицейлер жедел іздестіру шарасы кезінде жоғалып кеткен студенттің ісіне қатысты 3 күдіктіні қамауға алды, деп хабарлайды қалалық ІІД-нің баспасөз қызметі.

«10 ақпанда сағат 22.00 шамасында жедел-іздестіру шаралары барысында Астана қалалық ІІД-нің қызметкерлері із-түзсіз кеткен 1992 жылғы Ерасыл Әубәкіровтің өлі денесін тапты», делінген хабарламада.

Қылмыстық құқықбұзушылық жасады деген күдікпен үш күдікті тұлға Астана қалалық ІІД-нің уақытша ұстау абақтысына қамалды. Сараптама тағайындалып, сотқа дейінгі тергеу жүргізілуде.

Еске сала кетсек, Астанада 23 жастағы медицина ЖОО-ның студенті емтихан қарсаңында жоғалып кеткен. Студентті достары, туыстары іздестіріп, оны табуға еріктілер де жұмылдырылған болатын.

Дерек көзі: ҚазАқпарат