Қазақстандықтар қарызға күн көріп отыр

Баспасөз беттеріне шолу «Егемен Қазақстан» газетінің бүгінгі санында «Банктердің билеп-төстеуіне тосқауыл қашан қойылады?» деген тақырыппен мақала жарияланды. «Экономиканың қан тамырына айналған банктердің қоғамның дамуындағы рөлі өте зор. Оны осыдан 7 жыл бұрын АҚШ-та ипотекалық несиеден басталған әлемдік қаржы дағдарысының салдары айқын көрсетіп отыр. Әлемдік қоғамдастықтың бір мүшесі ретінде одан Қазақстан да сырт қалмады. Жалпы, қаржылық қызметті елімізде банктерден басқа, ипотекалық компаниялар, несиелік серіктестіктер, ұйымдар, қауымдастықтар, одақтар және факторингтік, форфейтингтік, лизингтік компаниялар мен микронесиелік ұйымдар да ұсына алады. Сарапшылардың айтуынша, қазір қаржылық қызметті ұсынушылардың ел өміріне дендеп енгені сонша, қазақстандық әрбір үшінші отбасы несиеге тәуелді болуда. Сондықтан несиелік жүйенің басты қатысушылары болып табылатын банктердің қызметіне қатысты сын да күн өткен сайын көбейіп келе жатыр», - деп жазады мақала авторы. Давоста Дүниежүзілік экономикалық форум аясында Мемлекет басшысы Нұрсұлтан Назарбаев «Арселор Миттал» компаниясының басқарма төрағасы Лакшми Митталмен кездесті, деп жазады «Егемен Қазақстан» газеті жұма күнгі санындағы «Бірлесіп іздегеннің ұтары көп» деген тақырыптағы мақаласында. «Нұрсұлтан Назарбаев пен Лакшми Миттал компанияның еліміздегі металлургия саласын дамытуға қатысуы, комбинаттың Теміртаудағы қызметі, сондай-ақ, түрлі инвестициялық және әлеуметтік жобалардың іске асырылуының аспектілерін қарастырды. Компанияның Қазақстандағы кәсіпорындарының жұмысына, соның ішінде өндіріс көлемінің төмендеуі мен жұмысшылар санының қысқаруына байланысты бірқатар проблемалық мәселелер сөз болды. Мемлекет басшысы бұл мәселелерді қарастырып, оларды шешу жолдарын Қазақстан Үкіметімен бірлесіп іздеу қажеттігін атап өтті», - делінген материалда.

***

«Айқын» басылымы соңғы жылдары қарапайым халық тұтынуға қажетті несиелерге көп иек арта бастағандығын жазып, қынжылыс білдіріп отыр. Соған орай, депутаттар алаңдаушылық білдіріп жатқан көрінеді. «Бұл төңіректегі мәселе қоғам назарын аудара бастады. Тіпті ел аралаған халық қалаулылары да жұрттан жағымсыз жағдайларды естідi ме, Парламент төрінен де қарыз мәселесін көтерді. «Мемлекеттің қарызға өмір сүруі қауіпті» деді күні кеше Кузьмин Мәжілістің жалпы отырысында. Премьер-Министр мен Ұлттық банк төрағасына сауал жолдаған ол: «Депутаттық сауалымның себебі халықтың екінші деңгейдегі банктерге тұтынушылық қарызының күрт өсуі болып отыр. Осы көрсеткіш 2013 жылғы 1 желтоқсандағы жағдай бойынша 2,2 триллион теңгені құрады. Тек қана бір күнтізбелік жыл ішінде, 2012 жыл мен 2013 жылдың қараша айлары арасында тұтынушылық қарыз 48% өсіп, 701 млрд теңгені құрады» деді», - деп жазылған «Қазақстақстандықтар қарызға өмір сүріп жатыр»тақырыбымен берілген мақалада. Сонымен қатар осы басылымның алғашқы бетінде аталмыш тақырыпқа орай, «Төлем қабілеті төмен азаматтарға кешірім жасалуы қажет пе?» деген сауал төңірегінде танымал қаржыгерлердің пікірлері берілген. *** «Майданда оқ атылып, адам өлді» деп жазады «Түркістан» басылымы. Янукович бұл тығырықтан қалай шығады? Аталмыш газет тілшісінің мақаласы әлем жұртшылығын елеңдетіп отырған осы оқиғаның жай-жапсарын кеңінен қамтуға тырысқан.

 ***

«Казахстанская правда» жұма күнгі санында елімізде ғылымның дамуына арналған бірқатар түйткілді мәселелерді көтеріп отыр. «Науке нужна молодежь» деген тақырыппен жарық көрген мақаланың авторы - ҚР БҒМ Экономика институтының профессоры, Нью-Иорк ғылым академиясының мүшесі Болат Құсайынов. Оның айтуынша, қазіргі таңда Қазақстанда 4230 ғылым докторы бар. Дегенмен оның тек 25 пайызы ғана зерттеу жұмыстарымен айналысады. Бұл үрдісті ғылымның мәртебесін өсіру арқылы, жастарды көптеп тарту негізінде жою қажет деп есептейді профессор.

Қазақпарат