Кәсіби мұнайшы – ел экономикасының жетекшісі

Маңғыстау өңірі – Қазақстан мұнай-газ саласының стратегиялық орталықтарының бірі. Бұл аймақтағы мұнай тасымалдау, сақтау және экспорттау жүйесінің үздіксіз әрі қауіпсіз жұмыс істеуі көптеген кәсіби мамандардың еңбегіне тікелей байланысты. Сол мамандардың бірі – Ерлан Боранбайұлы. Ол 2007-дан бері «ҚазТрансОйл» АҚ Маңғыстау мұнай құбыры басқармасында (ММҚБ) қызмет етіп келеді. Білікті инженер.

Ерлан Бүркітбаев өз еңбек жолын мұнай құбырларын пайдалану қызметінде инженер болып бастаған. Бұл кезеңде ол магистральдық мұнай құбырларын техникалық бақылау, жөндеу, пайдалану қауіпсіздігі және жүйенің үздіксіз жұмысын қамтамасыз ету бағытында еңбек етті.

2018 жылы ол «Қаламқас» БМАС және «Қаражанбас» МАС сұйық қойма парктерінің жетекші инженері қызметін қоса атқарды. Бұл қызметте Ерлан резервуарлық парктің техникалық жағдайын қадағалап, жоспарлы жөндеу жұмыстарының сапалы орындалуын ұйымдастырады. Мұнай сақтау резервуарларының сенімділігі мұнай тасымалының жалпы тиімділігіне тікелей әсер ететіні белгілі, сондықтан бұл лауазымның жауапкершілігі жоғары.

Биыл «Қаламқас» БМАС №1 резервуарын күрделі жөндеуден өткізу мәселесі күнтәртібіне шықты. Көлемі 5000 м³ сұйық қоймасына жүргізілетін бұл күрделі жөндеу жұмыстары бірқатар маңызды нәтижеге жетуге мүмкіндік берді. Атап айтар болсақ, резервуардың жұмыс қабілеті толық қалпына келтірілді, қауіпсіздік талаптары жаңартылған стандарттарға сәйкестендірілді; Мұнай сақтау парктерінің жылдық жалпы сыйымдылығы артты, бұл өңірдегі мұнай логистикасының тиімділігін күшейтті;«ҚазТрансОйл» АҚ үшін экономикалық пайда өсті, өйткені қосымша сақтау көлемі мұнай тасымалдау және сақтау процестерін оңтайландыруға мүмкіндік берді.

Бұл жоба инженерлік және ұйымдастырушылық тұрғыдан күрделі болды. Алайда кәсіби білікті әрі тәжірибелі мамандардың арқасында барлық жұмыс белгіленген мерзімде және талапқа сай аяқталды. Жобаның нәтижелі аяқталуына Ерлан Боранбайұлының қосқан үлесі аз емес. Ол кәсби әрі білікті инженер ретінде жобадағы ең жауапты міндеттерді атқарды. 

Ерлан Бүркітбаев – Қазақстанның мұнай инфрақұрылымында ұзақ жылдық тәжірибесі бар, жауапкершілігі жоғары әрі білікті инженер. Оның биылғы жобасы – аймақтағы мұнай инфрақұрылымының дамуына қосқан маңызды үлестерінің бірі. Сенімділік, тұрақтылық және тиімділік – оның кәсіби қызметінің басты қағидасы.