Атырау облысында қытайлардың ұшақтан түсіп жатқан видеосы тарады

Әлеуметтік желіде Қарабатандағы зауытқа бір топ Қытай азаматтарының келіп жатқанын түсіріп алған бейнежазба тарады. Бейнежазбаға қатысты Атырау облысы бойынша Мемлекеттік еңбек инспекциясы басқармасының басшысы Игілік ӘУБӘКІРОВ түсініктеме берді.

Облыстың бас еңбек инспекторының айтуынша, 22 қазанда «CNCEC» (China National Chemical Enginnering Co) компаниясының 124 қытайлық маманы интеграцияланған газ-химия кешенінің I фазасы жобасында жұмыс істеу үшін Нұр-Сұлтаннан Атырауға чартерлік рейспен келген.

Сол күні кешке келген қытайлық жұмысшылар CNCEC вахталық қалашығына қоныстанды. Дәл осы сәтті қазақстандық қызметкерлер видеоға түсіріп, жағымсыз пікір білдірген.

- Аталған факті бойынша CNCEC филиалы және KPI ЖШС (жобаның тапсырыс берушісі) қауіпсіздік қызметінің қызметкерлері бейнежазбаны түсірген адамдармен сөйлесті. Олар бейнежазбаны түсіргенде арам ойымыз болған жоқ деген, - дейді И.Әубәкіров.

Еңбек инспекциясы басқармасы қытайлықтар Қазақстанға іскерлік (жұмыс) виза бойынша келгенін және шетелдік жұмыс күшін тартуға рұқсат алу бойынша санатқа жатпайтынын атап өтті.

Естеріңізге сала кетейік, интеграцияланған газ-химия кешенінің I кезеңі дегеніміз Қытай Даму Банкінің ақшасына салынып жатқан Қарабатандағы полипропилен өндіретін зауыт, ал CNCEC компаниясы жобаның мердігері.

Материалды көшіріп басқанда және басқаша пайдалану кезінде azh.kz сайтына гиперсілтеме міндетті түрде қойылуы тиіс. Сондай-ақ ВК, Instagram пабликтерінде жариялауға тыйым салынады.