Головкин демеушілерге қол жайып отыр

Бірнеше жылдан бері қазақстандық боксшы Геннадий Головкинге лайықты қарсылас табу қиынның қиынына айналды. Сарапшылардың пікірінше, бұған себеп – шаршы алаңда жауырыны жер иіскемеген боксшылар белбеуінен айырылғысы келмейді. Оның үстіне бұған қаржы тапшы екен. Мәселенің мәнін ашып айтайық. АҚШ жұртшылығы Головкиннің әрбір жекпе-жегін асыға күтіп, оның өнерін қолпаштап отыратыны рас. Дегенмен, түбінде бөтен елдің тумасы болғандықтан, бауырым деп бауырына баса қоймасы да анық. Осы тұрғыдан алғанда, жат елде отандасымыздың жоғын жоқтап, кемтігін түгендеп отыратын қалталы азамат жоқ.

Головкин аты әлемге мәшһүр Мигель Котто, Карл Фроч, Флойд Мейвезер, Хулио Сезар Чавес, Питер Куиллин, Андре Уорд сынды беделді һәм белбеулі спортшылармен шаршы алаңда кездескісі келгенімен, қалтаның жұқалығы мұрша бермей отыр

Головкин аты әлемге мәшһүр Мигель Котто, Карл Фроч, Флойд Мейвезер, Хулио Сезар Чавес, Питер Куиллин, Андре Уорд сынды беделді һәм белбеулі спортшылармен шаршы алаңда кездескісі келгенімен, қалтаның жұқалығы мұрша бермей отыр. Сондықтан да Қазақстан атын әлемге паш еткен спортшыға демеулік жасайтын азамат тек қазақтың арасынан шығуы тиіс. Ал енді "Головкинге даңқты боксшылармен кездесуі үшін қанша қаражат керек?" деген мәселеге тоқталайық. Алғашқы орта салмақта WBC тұжырымындағы әлем чемпионы Мигель Коттоның 3 кездесудегі гонорары – 50 млн долларға тең. Яғни, ол әрбір жекпе-жектен 16-17 млн доллар табыс табады.

WBC ұйымы Котто мен Головкин арасында мәжбүрлі түрде кездесу өткізу туралы шешім шығарған

Айта кету керек, WBC ұйымы Котто мен Головкин арасында мәжбүрлі түрде кездесу өткізу туралы шешім шығарған еді. Ұйым мамандары оған дейін Коттоның ерікті түрде белбеуін қорғауына мүмкіндік берді. Осындай қысымнан кейін Пуэрториколық боксшы "Головкинмен кездессем бе, жоқ әлде белбеуден бас тартсам ба" деген сынды екіұдай пікірде қалып отыр. Сондықтан да бокс сарапшыларының пайымдауынша, Котто мен Головкиннің командасы жекпе-жек өткізуге қатысты белгілі бір келісімге келе алмай, қарсылас тарап белбеуден ерікті түрде бас тартады.

Сараптай келе, қос боксшының кездесуін тамашалау үшін 15 млн доллар қаражат бөлетін демеуші табу қажет.

Өйтпегенде, Коттоның жақтастары әрнені себеп қылып, қазақстандықтан мейлінше іргесін аулақ салары анық. Шындығына келгенде, Коттоның әрекетін бағамдасақ, мұндағы мәселе ақшада емес, пуэрториколықтың ниетінде деп нық сеніммен айтуға болады. Отандасымызға қаржы табылып жатқан жағдайда оған қарсылас атануы мүмкін атақты боксшылардың тізімін төменде келтірдік. Олардың кездесу өткізу үшін сұрайтын қаржысын да шамалап көрдік. 1. Екінші орта салмақта WBA және IBF тұжырымдарындағы әлем чемпионы Карл Фроч – 15 миллион доллардан астам 2. Әлемнің экс-чемпионы кіші Хулио Сезар Чавес – кемінде 10 миллион доллар 3. Орта салмақта WBO тұжырымындағы әлемнің экс-чемпионы Питер Куиллин – шамамен 3-4 миллион доллар 4. Екінші орта салмақта WBA тұжырымындағы әлем чемпионы Андре Уордпен кездесу үшін – 2 миллион доллар қажет.