«Болашақтың» арты – берешек болмасын...

...Тамыздың соңғы аптасы, шындығында, тым аптап болды... Әсіресе, Оңтүстік Қазақстан мен Алматы қаласы үшін... Қазақтың әйдік екі аймағы басшы­ла­рынан айырылды. Оңтүстіктің жұр­тына ақыл тоқтатып, өмір көр­ген өрісті азамат Бейбіт Атамқұлов бұйырса; алматы­лықтарға, тіпті, кішкентай ауылды да басқарып көрмеген көкөзек жігіт Бауыржан Байбек келді...  «Болашақ» бағдарламасының тұңғыш түлегін Елбасының өзі жетектеп әкеліп, Алматының азулы зиялысына таныстырды.  Түрінен Алматыдан ғана емес, адамзаттан түңілген кейіп көрінетін Ахметжан ЕСІМОВ еліміздің ең ірі ша­һарында 460 мың кәсіпкерлік ны­сандарының тұрақты жұмыс істей­тін­дігін; Елбасының Алматыны «қазақ экономикасының локомотиві» деп ата­ғанын; биылғы жылдың алғашқы жартысында іскер қаланың республика бюджетінің 3/1 бөлігін жинап үлгерген басты қанқұюшы (донор) ек­ендігін; Қазақстанның шикізат өнім­деріне әлемдік бағаның әсер ете алмайтын әрі шағын және ор­та кәсіпкерлікті негізге алған «бас­қа экономика» құруға тырысып жатқандығын; тіпті, осынау маң­ыз­ды тәжірибе үшін Алматы қала­сы­ның таңдалып алынғандығын; ке­рек десеңіз, бүгінгідей мұнай мен металдардың әлемдік құны құл­ды­ра­ғанда Алматының дәп осы артық­шы­лығы мен айырмашылығы ел эко­номикасының «жүрек қағысын» қал­ыпты ұстап тұрғандығын; қазақтың кең­байтақ даласында кәсіпкерліктің дамуына Алматыдан артық қолайлы жердің жоқ және Алматының тоқ­тау­сыз дамуға тиіс екендігін салқын сабыр, кемел сеніммен әңгімелеп берді. Біз сендік. Сабыр мен кемелдікке сендік. Ахметжан Смағұлұлының мой­ын­ындағы жауапкершілік жеңілдеген жоқ, керісінше, ауыр тарта түсті. Ас­тана қаласының әкімі Әділбек Жақ­сы­беков өз лауазымы мен «Астана ЭКСПО-2017» халықаралық көрмесі Ұлттық компаниясының басшылығын қатар көтере алмас еді. Біздің «ол­им­пиядалық арманымызды» Бейжің ұрлап кеткен соң, адамзат алдындағы абыройымыз – «Астана ЭКСПО-2017» халықаралық көрмесі болып қалды. Ахметжан ағамыз ауылшаруашылық агрономы болса да, қазақтың беделі үш­ін жаңа технологиямен «доста­сып», адамзаттың мүлдем тың күш-қуатының түрлерін табуға тура келеді... Ең бастысы, қазақтың абы­ройын сақтауға бөлінген қыруар қар­жылар беделімізді бес тиын қылып, талан-таражға түспесін. ...Ең қиыны, тамыздың жексенбі­сінің тамылжыған түні Алматының алып қоржынын бірге бөлісіп, майын ішіп, жілігін шаққан жуанқарындар үшін аспаннан түскен найзағайдай болды. Қойдың басын мүжіп, миын бірге жеген етекжеңді Ахметжанның орнына, немістен су үнемдеуді үйренген үрпекбас келе қалды. Елбасының «Алматы - жастар мен студенттердің қаласы болғандықтан, жас адам келді» дегенге меңзеген сөзін де әркім әрқалай қабылдады... Еліміздің ең белсенді экономикалық орталығы дүр сілкінді... Бауыржан БАЙБЕК - алақандай ауылды да жеке басқармаған, шаруа­шылық тәжірибесі мүлдем жоқ, ірі қалаға басшылыққа тағайындалған тұңғыш «болашақ» бағдарламасының өкілі және советтік басқару сатыларын көрмеген бірінші әкім. Бауыржан Байбектің шыққан биігі орынбасарлықтан асқан жоқ: Президент Әкімшілігі жетекшісінің орынбасары және «Нұр Отан» партиясы басшысының бірінші орынбасары. Жергілікті билікке қағазбен нұс­қау тарату мен аймақтың күллі шаруа­шылығын нақты басқарудың немесе интернет-жоба жетекшісі болу мен аса ірі құрылыс алаңын басқарудың арасы жер мен көктей!.. Дегенмен, Елбасы: «Бүгінгі жағ­дай­да Алматыны басқаруға тәжірибелі де креативті кадрлер керек» деп қалды. Бауыржан Бәйбектің «тәжі­рибесі» белгілі, ал, креатив деген не? Креативті болу дегеніміз – (create - ағылшын сөзі - жасап шығару тудыру) нақты жағдайда бұрын қолданыл­маған тың тәсілдер мен әдістерді қолдану арқылы қиындықтан шығудың немесе мақсатқа жетудің мүлдем жаңа жолдары. Жеке адамның білімі мен жігерін пайдаланып, дәстүрлі әдет-ғұрыптан мүлдем бөлек, жаңаша ой-санасымен тәуелсіз тәсілдер қол­данудың нәтижесінде батыл шешім қабылдауы. Американдық психологАбрахам Маслоу: «Креатив дегеніміз - әрбір адамда болғанымен, өскен ортасына, тәлім-тәрбиесі мен білім-білігіне қарай көбіне жоғалып кететін шығармашылық ынта мен бағыт» дейді... Алматы - қатардағы қарапайым қала емес, алып мегаполис. Алматыдай «өр кеуделі, нар болмысты» қалаға ынта мен бағыт аздық етеді, тіпті, мұны қауіпті қадам десек те артық емес... Бәлкім, Бауыржан Бәйбек - піл мен түйенің текетіресінің «жемісі» шығар, бірақ, өмір-орманында аса қауіпті жырт­қыштардың жүргендігін ұмытпау керек...  

Қажымұқан ҒАБДОЛЛА

qazaquni.kz