Тағы да ұлтшылдар, дәлірек айтқанда, оппозиция өкілдерінің құрылтайы өтеді

7
2651

Ұлт патриоттары өткiзген құрылтайдың iзi суымай жатып, тағы бiр топ жалпыхалықтық құрылтай өткiзетiнiн жария еттi. Бұл жолғы құрылтай бастамасын көптен берi көрiнбей кеткен Жармахан Тұяқбай бастаған ЖСДП өкiлдерi мен оларға қолдау бiлдiрген кейбiр саясаткерлер мен зиялылар көтерiп отыр.

Ж.Тұяқбайдың айтуынша, ақпан айына жоспарланған жалпыхалықтық құрылтай “Қазақстанның болашағы үшiн” атты тақырыпта өтпек. “Құрылтай өт­кiзетiн уақыт пiсiп жеттi, ел­дегi ахуал соны талап етiп отыр. Барлық экономикалық-әлеу­меттiк процестер тығырыққа тiрелдi. Бiз, азаматтардың тобы бүкiл азаматтық қоғам мен қоғамдық-саяси күштердi осы құрылтайға бiрiгуге шақырамыз. Барлық қарама-қайшылық пен жеке бас мүддесiн ысырып тас­тап, Қазақстан халқының атынан саяси реформа жүргiзудi та­лап етейiк”, – дедi ЖСДП-ның төр­ағасы сейсен­бi күнi өткен баспасөз мәслихатында.
Қызығы, дәл осы тақылеттес мәлiмдеменi Ж.Айтбайұлы 2012 жылдың 27 қаңтарында айтқан едi. Ол уақытта “Азат” ЖСДП бөлiнбегенiмен, ЖСДП-ның төрағасы ретiнде сөйлеген Ж.Тұяқбай баспасөз мәслихатына жалғыз өзi шығып, құ­рылтай шақыратынын жария еткен. Одан кейiн құрылтай алдындағы бiрнеше жиналыс өткенi­мен, құрылтайдың өзi ұйымдастырылмай орта жолда қалды. Оның арасында Тұяқбай мен Әбiлев тең төраға болған “Азат” ЖСДП-сы екiге айырылып тынды. Ендi мiне, Жармахан Айтбайұлы өзi баяғыда бастаған бастаманы екi жылдан кейiн қайта қолға алмақ.
Ж.Тұяқбайдың пiкiрiнше, ел мұндай ахуалға мүмкiндiгiн та­уысқан авторитарлық билiк пен президенттiң шексiз өкiлетi кесiрiнен тап болды. “Прези­денттiң шексiз өкiлетi билiктiң өзге тармақтарын фикцияға айналдырды”, – дейдi ол. Сөйте тұра, саясаткер елдегi демократиялық өзгерiстердi президент Н.Назарбаевтың өзi iске асыруы тиiс деп есептейдi. “Бiз қазiргi жағдайда өзгерiстердi жасаудың ең дұрыс, ауырға соқ­пайтын жолы – оны прези­денттiң iске асыруы деп түсiне­мiз. Сондықтан президенттi ел­дегi қиын ахуалды түсiнiп, тарих пен азаматтардың алдындағы жауапкершiлiгiн сезiне отырып, нақты демократиялық реформалар мен экономикалық-әлеу­меттiк модернизация жасауға шақырамыз”, – дейдi ол.
 Ж.Тұяқбайдың құрылтай өткiзу жөнiндегi бастамасын қолдаушылардың арасында Әмiрбек Төгiсов, Балташ Тұр­сымбаев, Петр Своик, Болат Әбiшев сынды партияластарынан бөлек Қазақстан Комму­нистiк партиясының құрметтi жетекшiсi Серiкболсын Әбдiл­дин, Коммунистiк партияның хатшысы Ғазиз Алдамжаров, жазушы Қабдеш Жұмадiлов бар.
Ұйымдастырушылардың айтуынша, бұл құрылтай ұлт пат­риот­тары өткiзген жиынға кереғар емес, керiсiнше, мақсат-мiндетi бiр. Ұлт патриоттары өткiзген құрылтайды қолдаған Қабдеш Жұмадiлов бұл жолғы құрылтайға да қатысатынын айт­ты. “Бiз, өз отанымыздың патриоттары қазақ халқы жақсырақ өмiр сүрсе, бұдан ешкiмге зиян келмейтiнiн түсiнуiмiз керек. Құрылтай қазақты бөлiп-жармай, бiрiктiруi керек”, – дедi ол.
Ал Серiкболсын Әбдiл­диннiң пiкiрiнше, екi құрылтай ортақ мiндет үшiн бiрiге алады. “Өткен құрылтай мен өтетiн құрылтай екi компартия немесе екi “Ақ жол” партиясының оқиғаларын еске түсiредi. Халық шатасып, кiмнiң артынан еретiнiн бiлмей қалуы мүмкiн. Бiрақ бұл жерде бiз бiр майданға бiрiге аламыз. Бiздiң талап-тiлегiмiз бiр – өзгерiстер қантөгiссiз жасалса деймiз”, – дедi С.Әбдiлдин.
Ж.Тұяқбай мен оның се­рiктерi ұрандатып тастаған “Елдегi барлық саяси күштер құрылтайға бiрi­гiңдер!” деген бастамаға өзге саясаткерлер қалай қарайды? Кезектi құрылтайға қатысып, қолдау бiлдiре ме? Бiз осы сұрақтарды бiр­неше саясаткерге қойып көрген едiк.
“ПАРТИЯНЫ ТӘРК ЕТКЕН АДАМНЫҢ БIРIГУ ТУРАЛЫ ҰРАН ТАСТАУҒА МОРАЛЬДЫҚ ҚҰҚЫҒЫ ЖОҚ”
Әмiржан ҚОСАНОВ, ЖСДП төрағасының бұрынғы бiрiншi орынбасары:
– Ел алдындағы басты проблемаларды шешуде қоғамдағы әртүрлi күштердiң бiрлесе қи­мылдағаны дұрыс, ондай жақсы идеяны ешкiм де жоққа шығара алмайды.
Бiрақ өмiрде де, саясатта да “моральдық құқық” деген түсiнiк бар. Бiрiккен ЖСДП “Азат” партиясын тапа-тал түс­те қақ жарып, 2009 жылы екi партия делегаттары қабылдаған маңызды саяси шешiмдi 2013 жылы бiр жақ болып жиналып алып, жоққа шығарған адамның қоғамға қайтадан бiрi­гу туралы ұран тастауға моральдық құқығы бар ма? Гәп сонда! Ертең ел аралағанда сол делегаттардың бетiне қалай қарай алады екен? Әрiптесте­рiмiз оппозиция бiр­лiгi үшiн өмiрiн, бас бостандығын құр­бан­дыққа шалды емес пе?! Ең болмаса, солардың рухының алдында ұялмай ма екен?!
Тұяқбай мырза шын ниетiмен бiрлiктi қаласа, ЖСДП “Азат” секiлдi ортақ та бiрегей партияның қатарында-ақ жүрiп, сол бiрлiктi көздiң қарашығындай сақтап, өз амбициясын ысырып тастап, сол мықты ұйым негiзiнде бiрлiктi нығайта түспедi ме кезiнде?!
Өз басым осы жылдың 20 наурызында бiрiккен ЖСДП “Азат” партиясын тәрк етiп, елден жасырын саяси путч жасап, мен секiлдi әрiптесiн съезге кiргiзбегенiнен кейiн Тұяқбай және оның ЖСДП-дағы қазiргi әрiптестерi “шын мәнiнде халық қамын ойлап жатыр және осы күнге дейiн билiкке қарсы сын айтып жүрген күш­тердi топтастыра алады” дегенге сенбеймiн! Халықтың көзi ашық. Елдегi ағайын бәрiн де түсiнедi, саяси алаңда кiмнiң кiм екенiн баяғыда-ақ бiлiп, өз бағасын берiп қойған.
Оның үстiне соңғы кезде қазiргi ЖСДП саяси белсендiктен тiптi ада. Нағыз оппозициялық мi­нез, қимыл-тiрлiк көрсете алмай қалды. Ешкiм де елемейтiн бiр “домалақ” үстелдер өткiздi деп ес­тiп жатамыз… Жаңаөзен қырғыны кезiнде үнсiз қалды, барлық демократтар құрамына енген Қо­ғамдық комиссияға кiруге жарамады. Өткен жолы барша жұрт қолдаған Еу­разиялық Одаққа қарсы референдум шаруасына да араласпады. Маңызды науқандардан бойын ау­лақ ұстайтын саяси ұйымның ел iшiнде шынайы беделi қандай болмақ?! “Осының бәрiнiң ар жағында билiк тұрған жоқ па?” деген сауалдың да қылаң беретiнi рас.
Көңiлге күмән қондыратын тағы бiр жайт бар. Кеше ғана ұлттық тұрғыдағы азаматтар мен күш­тер өз құрылтайын, өз жиы­нын өткiздi. Жақсы ма, жаман ба, жиналыс өттi, белгiлi бiр құжаттар қа­былданды. Ендi, мiне, iле-шала тұяқбайшылар тағы да бiр құрылтай өткiземiз деп жатыр. Ұлтшылдармен жарысып, олардың құрылтайына балама не бәсеке болғысы да ке­летiн сияқты. Ең болмаса, жиынның атын басқаша атамай ма?!
“ЖЫЛЫ ЖЕРГЕ ЖИНАЛЫП АЛЫП СӨЙЛЕГЕНШЕ, НАҚТЫ КӨМЕК КӨРСЕТСIН”
Мұхтар ТАЙЖАН, саясаткер:
– Ай сайын құрылтай өткiзудiң өзi күлкiлi. Өткен құрылтайға қатысқан жоқпын, бұл құрылтайға да қатыспаймын. Себебi жұ­мыс нақты болуы керек, жиын-отырыстарға өз басым тойдым. Мәселен, ұлт патриоттарын алайық. Жаңаөзен оқиғасы бол­ғанда, олар қайда жүрдi? Немесе биылғы жылдың жазында Шеңгелдiде шешен азаматтары екi қазақ жiгiтiн атып кеткенде қай­да қарап отырды? Халыққа нақты көмек, қам­қорлық көрсету керек. Ал ғимараттың iшiнде топтасып алып иланғандарды нандырып, ақылды сөз­дер айтудың қажетi шамалы. Одан да Шеңгел­дiде оқ тиiп жараланған Бекмұқа Ерсайынға адвокат қажет, қорғаушы жалдауға көмектессiн. Немесе Жаңаөзенде жараланған, қайтыс болған азаматтардың отбасына кө­мектессiн. Жиын өткiземiз деп желге ақша шашқанша, қазаққа осындай жол­мен қол ұшын созғаны әл­деқайда тиiмдi болар едi.
Содан кейiн мына жиын­ды ұйымдастырушылардың ортасында Петр Своик отыр. Қазақ тiлiне қарсы пiкiр бiлдiрген онымен не құрылтай өткiзе­мiн? Қандай мәселе тал­қылаймын?
Саясатта сенiм деген ұғым бар. Ж.Тұяқбай өмiр­де жақсы адам болуы мүмкiн, бiрақ оның ақша алғаны туралы роликтi интернеттен көрдiк. Осыдан кейiн онымен бiрге қалай саясат құрамын? Онда мен де соның деңгейiне түстiм деген сөз ғой.
Әрi-берiден соң құ­рыл­тай – ынтымақтасудың, нақты iстiң соңғы қадамы болуы тиiс. Яғни, iстiң басы емес, нәтижесi болуы шарт. Ал нәтиже болмай тұрып, құрылтайдан бастаймыз деу – қате.
“ЖИЫННЫҢ БӘРIН ҚҰРЫЛТАЙ ДЕЙ БЕРМЕСIН”
Жасарал ҚУАНЫШӘЛI, саясаткер:
– Тұяқбай басқаратын ЖСДП партиясын оппозиция деп есептемеймiн, сондықтан құрылтайды оппозиция өткiзедi дегенмен де келiспеймiн. Бұл құрылтай өтедi дегелi қанша уақыт өттi, одан берi тып-тыныш жатты, не iстегендерi белгiсiз.
Мұндай жиындар құ­рылтай деген сөздiң мәнiн кетiрiп бiттi. Өткенде Дос Көшiмдер өткiздi, ақыры түк болған жоқ, ұлт патриот­тары шулатып құрылтай өткiздi, одан да түк өнбе­дi. Ендi мына құрылтайдың да ақыры не болары бел­гiсiз.
Жеке басым Тұяқбайға сенбегеннен кейiн, олардың құрылтайы да дұрыс болатынына сенбеймiн.
Соңғы кездерi жиын өткiзсе бiттi, оны құрылтай деп атайды. Ал ол жиын сол мiндеттi атқарып отыр ма, мән-маңызы соған сай ма, ауқымы мен ұйымдастыруы жағынан, қоғамдық ұйымдар мен саяси күш­тердi жұмылдыру жағынан құрылтай деген атқа лайық па, онымен iсi жоқ. Құрылтай деген – қазақ тарихында үлкен, күрделi жиын болған. Ал мына құрылтайды олай деп атай алмаймын.
Олай болса, бұлардың мақсаты мен көздегенi не? Қай-қайсының не көздегенiн болжау қиын. Бiреулер болашақта өте­тiн үлкен құрылтайдың мәнiн кетiрiп, ел сенбей­тiндей ету үшiн жасалып жатқан әрекет десе, ендi бiрi өзге бiреулер өткiзiп жiбермесiн деген мақсатпен билiктiң тапсырмасын орындап жүрген бағынышты адамдардың пиғылы дейдi. Құрылтай өтсе, өз деңгейiнде болсын. Олай болмаса, жүртты да, өздерiн де әуреге салудың қажетi жоқ.
Елнұр Бақытқызы

7 ПІКІРЛЕР

  1. қашанғы көзбояушылықпен жүреді екенбіз.оппозиция жоқ мүлдем бізде. болған күннің өзінде оларды қолдап қорғайтын халық жоқ. президенттің алдына барып жалған ақпаратты үйіп төгеді. халықтың жағдайы жақсы. халықтың қарны тоқ киімі бүтін дейді. қалалы жерден басқасы үкіметтің көзіне түспейді. қаланың шет жағасына шықсаң шаң тозаң жарық жоқ, ауыз су жоқ, газ жоқ. 21ші ғасырда емес алі күнге 18ғасырда жасап жатқандай. Президентіміз айтады айтады ал қол астындағылар орындамайды. бұны қалай түсінеміз, үкіметтің құтырып басқа шыққаныма. мысалыға алсақ президент айтады 5млн тенге бөлінсін халыққа дейді. бөледі 5млнді 3млн қылып, ол 3млн халыққа келгенше 200мың тенге болып жетіп келеді.президентімізге осының барін жеткізітін, қадағалайтын оппазицияның көмегі қажет. бір елді басқару оңай шаруа емес. президентіміз айтудай айтып жатыр ауыл ауылды бірақ үкімет әбден өз бетімен кеткен

  2. Осы «Құрылтай» деген сөзге бәрі құмар, Құрылтай өз деңгейінде өтсе бір сәрі. Мен білетін Тарихта Құрылтай анау Шыңғыс ханның тұсында болған, Содан кешегі Ресейде ,1918 жылы қаңтардың басында Петербор қаласында Таврия сарайында өткен. Оның өзін матрос Железняков келіп «Караул устал»- деп, наганын шошайтып таратып жіберген.Бізде шын Құрылтайды өткізу мүмкін емес. Олай дейтінім : қазіргі Билік оған жол бермейді. Менің ойымша нағыз Құрылтай өткізу ұшін – ресми түрде әр облыстан делегат сайлау керек! Ашық түрде ,Билік оған ешқандай кедергі істемеу керек. Ал қазір қалай өтіп жатыр:,Айтайын. Тығылып,бұғып жұмыста жоқ,немесе, Билікке тәуелсіз емес бірлі-жарым адам барады ана Құрылтай сымағына.Бұл Билік тұрғанда Құрылтай өткізем -деп жүргендер-атақ іздегендер.Біз ешқашан Украина бола алмаймыз.»Майдан» бізге – Утопия !!!

  3. Мен 1 сағаттай болды, облыстық (павлодар) партия жиналысынан келдім. Жиылыста Ж.Тұяқбай, Б.Тұрсынбаевтар болды. Жаңадан ф-л басшысы сайланды. Кекшіріңіздер, мүмкін көпшілікке ұнамаймын, бірақ бұл кісілердің баяндамалары жасанды да жаттанды сөздерге толы болды. «Қаржы осындай істерге осыншама, бөлінеді, бірақ нәтижесі жоқ, қайда кеткенін ешкім білмейді» «Халықты үрей билеген, олар осындай жиылысқа келуге де қорқады.» «Нағыз демократтар бізбіз» т.т. Әрине, айтқандарының көбі дұрыс. Бірақ тәуелсіздікке төнген қауіп, КО арқасында кеден баж салықтары ресейге 90 пайыз кетіп жатқаны, яғни ұтылып жатқандығымыз айтылған жоқ. Бағаның шарықтауы туралы сөз болды да, мында да ресей ықпалы екені айтылған жоқ. Қазақ бизнесі ресейден бұғат көріп, олардыкі керісінше, барынша елге еніп жатқаны, оның экономикаға кері әсер етіп жатқаны да айтылған жоқ… Демократия болғанда да: Бірнеше рет осы тектес сұрақтарды Ж. Тұяқбайға қояйын деп қазақша сұрағам бар еді дегенде бермеді. Менен басқа қоятын сұрақтарын, сөйлейтін сөздерін айтуға ешкімге шектеу болған жоқ. Кеше, осы жиылысқа мені шақырғанда, С.Алибаев, (ЖСДП орынбасары ма, Астана ф-лы басшысы ма), қазақ тілінде сөйлеу қауіпті деген мағнада айтып еді. Жиында, сөйлегендер де бір ауыз қазақша сөз айтқан жоқ. Кешіріңіздер, майда-шүйделі мәселелерді ғана талқылап, – жасанды, осы шеңберден шықпаңыздар деген тапсырманы орындап отырғандай әсер етті маған. Мүмкін бұл облыс деңгейінде, ал республикада деңгейінде басқаша болады? Уақыт көрсетеді. Тағы кешіріңіздер, қазір әр қазақты толқытып жүрген, ұлттық, мемлекеттік деңгейдегі ең мағналы мәселелерді көтермейтін, қазақша сөзден қас жауындай қорқатын оппозицияның маған керегі шамалы. Кешіріңіздер, нағыз қазақтың ерлері болса, қазақша бір сұрақ қоюға рұқсат беруге болушы едіғой. Сонымен, қазақша да сөйлеуге, сұрауға болады екенін, партия жиылыстарында өмірі қазақша сөз естімегендерге, сонымен болса да ұлтының алдында бір тамшы перзенттік парызын орындауға болушы еді. Бірақ олар қазақша қойылатын сұрақтан қатты шошынды…

Пікір жазу

Пікіріңізді енгізіңіз!
мұнда сіздің атыңызды енгізіңіз