Форт-Шевченко қаласының әкімі қамауға алынды

Түпқараған ауданының сотында Форт-Шевченко қаласының әкіміне мас күйінде көлік жүргізгені үшін айып тағылды. Ол 15 тәулікке қамауға алынды, деп хабарлайды Zakon.kz.

"Лада" сайтының мәліметінше, сот Шалқыбай Әзірбаевты жеті жыл мерзімге көлік жүргізу құқығынан айыру туралы шешім шығарды, бірақ сотталушының өзі кінәсін мойындамады.

Түпқараған аудандық сотының баспасөз қызметі нақтылағандай, әкім өзінен алкоголь иісінің шығуына ауырып тұрғандықтан мойнына жаққан спирттен болды деп түсіндірген. Шенеунікке қатысты ҚР ӘҚБтК-нің 608-бабының 1-бөлігі бойынша әкімшілік іс қозғалды.

Сотта Әзірбаевтың Ақтау – Форт-Шевченко тас жолының үшінші шақырымында мемлекеттік нөмірі 397 АС 12 Toyota Camry маркалы көлігінің рөліне мас күйінде отырғаны анықталды. Медициналық куәландыру қорытындысы оның ағзасында 0,73%, яғни жеңіл дәрежедегі алкогольдік масаңдықты растады, деп хабарлады Түпқараған аудандық сотының баспасөз қызметі. 

ҚР Әкімшілік құқық бұзушылық туралы Кодексінің 608-бабының 1-бөлігінде 15 тәулікке әкімшілік қамауға алу және жеті жыл мерзімге көлік құралын басқару құқығынан айыру жазасы қарастырылған.

Сот қаулысымен Шалқыбай Әзірбаев ӘҚБтК-нің 608-бабының 1-бөлігі бойынша әкімшілік жауапкершілікке тартылып, 15 тәулікке қамау алу және жеті жыл мерзімге көлік құралын басқару құқығынан айыру түрінде әкімшілік жазаға тартылды.

Қаулы заңды күшіне енген жоқ.