...Боданнан босай сала, қып-қызыл саудаға бас қойдық: зауыттар мен фабрикаларды, балабақшалар мен дүкендерді, алтын мен күмісті, мұнай мен уранды, мыс пен мырышты сутегін бердік, тіпті, гектарлаған туған жердің топырағына дейін саудаға салдық...
Сөйтсек, «судың да сұрауы боларын» ұмытыппыз. Лезде саудалағанымыз таңдайға татымай, отқа салған мұздай еріп кетті...
Өркениетке өңмеңдеп, гендер-тендермен алысып жүргенімізде, сыбайласқан жемқорлықтың құрығына түсіп қалдық...
Ана тілімізге шыққан сүйелдей орыстың сөзінен құтыла алмай жатқанда, мұрынынан мыңқылдаған ағылшын жабыса кетті, шаужайымызға...
«Еркінбіз!» деп қаншама еліргенімізбен, елдігіміз еленбей, ұлттығымыз ұран бола алмады. Жұртымыздың жартысы жыртық-жамау, аш-жалаңаш...
Ауыздыға сөз бермей, «Қазақстанда 130 ұлттың өкілі бар» деген мақтангершілігіміз қайда?! 2009 жылы жүргізілген ұлттық халық санағының дерегі мынадай:
Қазақтар – 63,6 пайыз,
Орыстар – 23,3 пайыз,
Өзбектер – 2,9пайыз,
Украиндықтар – 2,0 пайыз,
Ұйғырлар – 1,4 пайыз,
Татарлар – 1,2 пайыз,
Немістер – 1,1 пайыз,
Басқа этностардың жиынтығы –
4,5 пайыз...
...Қазақ болмысынан кеңжүрек, кеңпейіл. Жақсыны жатсына қоймайды. Әйткенмен, ойдан қашқан, қырдан асқан, Тыңға келген-Тыңшы боп енген, «қырық рулы» елдің синтезінен саф алтын жасауға ұмтылу – құр әурешілік. Атам қазақ: «Темірдің бәрі алтын емес» дейді...
...Халқымыз өз болмысы мен рухын анықтап алмай, тілі мен дінін қорғамай, Арқанкергендер де азаймас, «терроршылар» да түгесіле қоймас...
Өзін тапқан, рухын таныған ұлтқа бақ-береке де, ырыс-ынтымақ та күн нұрындай құйылады. Меніңше, кемел келешектің сенімді кілті қазақ ұлтының құлпырып-бусануында. Ең басты мақсат, ең маңызды мүдде – туған ұлтымыздың
күрт көбейіп, қаулап өсуі болуға тиіс. Мемлекеттің барлық ішкі-сыртқы саясаты осынау ұлы мақсат-мүдделерге қызмет еткенде ғана ұлттың келешегі мен қауіпсіздігі толық қамтамасыз етілетін болады.
Құлтас ДОСТАН