«Шіріген жұмыртқа» сыйлығын ИРТЫШБАЕВтан басқа кімдер алады?

  «Мемлекеттік тіл» қоғамдық қозғалысы ұлттық, тілдік мүдделерге қарсы шыққан адамдарға арнап «Шіріген жұмыртқа» атты сыйлық тағайындаған болатын. Оның алғашқы иегерлері Е.Ыдырысов, Ә.Сәйденов және т.б. екені белгілі. Биылғы жылы әр азаматтың қоғам алдындағы беделін бес тиынға дейін құлдырататын бұл сыйлықтың 2 қазан күні өтетін «Мемлекеттік тілді қолдау» акциясына ерекше кедергі келтірген адамдарға берілуі әбден мүмкін...    Үстіміздегі жылдың 2-қазан күні Алматы қаласында қалалық әкімшіліктің рұқсатымен мем­лекеттік тілді қолдауға қатысты митинг өткелі жатқаны белгілі. Ұйымдастыру комитеті дайындық жұмыстарын бастағалы бері түрлі қиындықтарға тап болуда. Былтырғы өткен «Мемлекеттік тілді қолдау» акциясында да жоғарғы және арнаулы оқу орындарының басшылары студенттерді акцияға жібермеуге жанын салып бақты. Биылғы жылыда олардың кейбіреулері сондай мінез көрсетуде. Әсіресе, Тілектес Есполов басқаратын Қазақ ұлттық аграрлық университетінде студенттерге «Мемлекеттік тілді қолдау» акциясына барсаң сабақтан және жатақханадан қуыласың» деп қысым көрсетіп жатқаны белгілі болды. Митингіге шақырып жүрген жүрген студенттердің үнпарақтарын факультет декандары тартып алып, оларды түсінік жазуға мәжбүрлеген. «Мемлекеттік тілді қолдау» акциясы өтетін 2-қазан күні Ғалымқайыр Мұтанов басшылық ететін Әл-Фараби атындағы Қазақ ұлттық университеті жатақханаларында бұрын жоспарланбаған студенттер фестивальін өткізуді қолға алыпты. Мұндағы негізгі мақсат жастарды ұлт, тіл мүддесіне араластырмау. Ғ.Мұтанов секілді ректорлардың атына Мұхтар Шаханов өтініш хат жазса да, мемлекеттік тілді қолдау жиыны Алматы қалалық әкімшілігінің рұқсатымен өткелі жатқанын университет басшылары қаперге алмауда. Міне, осындай масқарашылық бірінен соң бірі көрініс беруде. Кандидаттар тізімі жалғаса береді...

«Шіріген жұмыртқа» сыйлығының жаңа үміткерлері

Бүгін  сыйлыққа кезекті кандидаттар анықталып отыр. Олар Президенттің саяси мәселелер жөніндегі кеңесшісі Ермұхаммет Ертісбаев пен шығармаларын орыс тілінде жазатын, ана тілін менсінбейтін жазушы   Дүйсенбек Нақыпов және мәжіліс депутаты Мұхтар Тінекеев. Ертісбаев «қазақстандық ұлт» идеясының белді қолдаушысы ретінде бұған дейін де танылған. «138-дің хаты» жарияланған тұста да үндемей, қарсы сөз айтпай отыра алмаған азаматтардың бірі осы космополит. Осындай дара қылықтары үшін Ертісбаев көпшіліктің арасында Иртышбаев деп аталып кеткен. Ұлттық мүддеге қарсылығымен  жұрт назарын өзіне аударған Президент кеңесшісін «Шіріген жұмыртқа» сыйлығына ұсынбау мүлде ұят сияқты. «Правда Казахстана» басылымының бетіне ұлт, тіл мүддесіне қарсы жұмыс істеп жүрген Дүйсенбек Нақыпов мырза да қалың бұқараның сын садағына қазақ тілін қорғаушыларға қарсы ауыр сын айтамын деп іліккен. Ол «Кому нужен разрушенный Вавилон?» атты мақаласында  «Не знаю, какой бес попутал Мухтара Шаханова, но я по-настоящему поражен его популисткому шедевру. Никто не оспаривает значения поэзии почтенного мэтра, однако стоит задуматься о причинах, побудивших его инициировать это странное, чтобы не сказать антиконституционное письмо» деп буынсыз жерге пышақ  ұрғанын қалың оқырман оқыды. Онысымен өзін толерантты қоғамның жаршысы ғып көрсеткісі келетін автор елдегі ұлтаралық катынасты тіліне қайта-қайта тиек еткен еді. Дүйсенбек Нақыпов мырзаға Ардақ Нұрғайдар есімді бауырымыз «Абай.кз» сайтында жауап жазған да еді.(http://www.abai.kz/content/ardak-nyrgaidar-ashyk-khat-kimderdin-kytygyna...). Өз қағынан жеріген Дүйсенбек мырза да «Шіріген жұмыртқа» сыйлығын иеленуге талапкер кандидаттар қатарына енуге әбден лайық. Ұлт зиялыларының қазақ тіліне қатысты ашық хатына қос қолын көтеріп қарсы болған мәжіліс депутаты Мұхтар Тінекеев те «Шіріген жұмыртқа» сыйлығына үміткерлердің қатарында. "Для меня спокойствие в стране прежде всего. (...) Я лично считаю, что русскоязычное население будет выступать против",- деген мәжіліс депутаты орыстілді қауым наразылығын алғашқы болып тұтандырды. Біз Мұхтар Тінекеевке орыстілді азаматтардың қандай алғыс айтқанын білмейміз, ал біз, қазақ тілді қауым оны «Шіріген жұмыртқа» сыйлығына үміткерлердің қатарына қостық. Ұйымдастыру комитеті