Мәулен Әшімбаев: Елдік мүддеге қызмет ету – қазақ телевизиясының негізгі миссиясы

8
4026

Елімізде қазақ телевизиясының 60 жылдық мерейтойы кең көлемде аталып өтілуде. Осыған орай бүгін бірқатар мерейтойлық іс-шараларға қатыстым. Шын мәнінде бұл тек тележурналистердің ғана емес, күллі қазақ халқының қуанышы.

Қазақ телевизиясы іргесі қаланған 1958 жылдан бері халқымыздың ұлттық құндылықтарын дәріптеп, ұлттық болмысымыздың сақталуына зор еңбек сіңірді. Кеңес заманындағы идеологиялық қысымға қарамастан ана тілімізді сақтап, ұлттық сананың оянуына үлкен үлес қосты. Сол арқылы егемендіктің рухани негізін қалап, Тәуелсіздігімізді жақындата түсті.

Жалпы елдік мүддеге қызмет ету және ұлттық кодты сақтау үшін жұмыс істеу – қазақ телевизиясының негізгі миссиясы. Осы абыройлы міндетті отандық телевизияның аға буын өкілдері артығымен орындады. Кешегі Камал Смайылов, Шерхан Мұртаза, Ақселеу Сейдімбек сияқты алыптардың ізі қалған қарашаңырақ ұлтымыздың рухани ұйытқысына айналды. Осы ауқымды жұмыстардың бел ортасында әкем Сағат Әшімбаевтың да болуы, оның отандық телевизияның өсіп-өркендеуі жолында өз қолтаңбасын қалдыруы мен үшін ерекше мақтаныш.

Бүгінде Ерлан Тынымбайұлы басқарып отырған «Қазақстан» ұлттық телеарнасы тарландар салған даңғыл жолдан жаңылмай, басты миссияны лайықты жалғастырып келеді деуге толық негіз бар. Біздің ендігі басты міндетіміз – ХХІ ғасырдың талаптарына сай, бәсекеге қабілетті ұлтқа айналу және «Рухани жаңғыру» бағдарламасына сәйкес қоғамдық сананы жаңғыртып, халқымызды жаңа белеске көтеру. Ұлттық арна ұжымы бұл миссияны да абыроймен атқарады деп сенемін.

Осы жолда еселі еңбек етіп жүрген еліміздегі барша тележурналистер қауымына табыс тілеймін. Еліміздің мерейін өсіріп, ұлтты ортақ мүддеге ұйыстыратын мерейтой құтты болсын!

Мәулен Әшімбаев,

«Нұр Отан» ХДП төрағасының бірінші орынбасары

Фейсбук парақшасынан алынды

8 ПІКІРЛЕР

  1. Ботакөз замандастан сөз қалған ба?! Тұп-тура дұрыс айтады! Менің айтпағым да осы! Бірақ, осыны есту керек биліктегілердің бәрі соқыр, саңырау емес, таскерең, көрсоқыр.Тағы да «білме, білгеннің тілін алма» деген қарғысқа ұшырағандар. Сондықтан, тірі жан жоқ иен далада кездеме сатқан саудагер сияқты ешкім оқымайтын пікірді жазғың да келмейді екен.

  2. МАУЛЕН МЫРЗА, ЕЩҚАНДАЙ МИССИЯНЫҢ ИІСІ ДЕ ЖОҚ, ЭФИРЛЕРІҢДІ БАСҚА ЕЛДІҢ СЕРИЯЛДАРЫМЕН ЖАПТЫҢДАР, ҚАЛҒАНЫН МӘНСІЗ МАҒЫНАСЫЗ ҚАБАТОВ ТАҒЫ СОЛАР СИЯҚТЫЛАРДЫҢ ҚҰНСЫЗ БАҒДАРЛАМАЛАРЫНА БЕРДІҢДЕР, ОДАН ҚАЛДЫ ТОҚАЛДАР, ДАУЫССЫЗ ӘНШІЛЕР, МӘДЕНИЕТСІЗ САУАТСЫЗ ЖҮРГІЗУШІЛЕР, АЛ ЕРТЕГІ ӘЛЕМІНДЕ ТҰРЫП ЖАТҚАН ҚАЗАҚ ЕЛІНІҢ АЗАМАТТАРЫ ЖАЙЛЫ ЖАҢАЛЫҚТАРЫҢА ОСКАР БЕРУГЕ БОЛАДЫ, ОСЫ ЖАЙЛЫ ӘРІ ҚАРАЙ АЙТА БЕРУГЕ БОЛАДЫ, БІРАҚ ОНЫ ЕСТИТІН ҚҰЛАҚ ЖОҚ. СОНДЫҚТАН СІЗ ҚАНДАЙ ЕЛДІК МҮДДЕ ЖАЙЛЫ АЙТЫП ОТЫРСЫЗ, ОСЫНЫ КӨРМЕЙ НЕ БІТІРІП ОТЫРСЫЗДАР.

  3. Біздің Телеарналарымыздан түріктің, индияның сериялдарын және тағы басқа құнсыз бағдарламаларды алып тастап, олардың орнына көңілге қонымды, тәрбиелік мәні көп; тілімізді, дінімізді, мәдениетімізді, салт-дәстүрлерімізді насихаттайтын бағдарламаларды көрсету керек!

  4. Шетелдік телеарналар мен басылымдарды тарату тоқтататын уақыт баяғыда жетті! Нұротаносыны қолға алуы керек

  5. Қазақ Еліндегі барлық теле, радио, интернет сайттары, газет журналдары Қазақ тілінде ғана шығарылуы керек. Және олардыің басты міндетті Ұлттық құндылықтарды, бірлікті насихаттау тиіс.

  6. Қазақ телеарналарының негізгі міндеті – ұлттық мүддеге қызмет ету екенін тура айтыпты

Пікір жазу

Пікіріңізді енгізіңіз!
мұнда сіздің атыңызды енгізіңіз