Мүфтият «діндар» ата-аналарды зайырлы елдің заңдарына мойынсұнуға шақырды

6
1643

Мектеп оқушыларының киім үлгісіне қатысты туындаған дауға мүфтият араласып, ислами тұрғыдан өз пікірін білдірді. Естеріңізге салайық, бүгінде «діндар» ата-аналар жалпыға ортақ мектеп формасынан бас тартып, кішкентай қыздарын хиджабқа орап мектепке жіберетін болған. Қазақстан мұсылмандар діни басқармасы мұның дұрыс емес екенін және осы елдің азаматтары болғандықтан баршамыз оның заңдарына бағыну міндетіміз екенін айтып отыр.

Мүфтият "діндар" ата-аналарды зайырлы елдің заңдарына мойынсұнуға шақырды

Қазақстан мұсылмандары діни басқармасының мектептегі киім үлгісіне қатысты мәлімдемесі

Қазақстан мұсылмандары діни басқармасы оқушы қыздардың мектепке орамал тағып баруға байланысты ата-аналар мен оқу орындары басшылары арасында туындаған әртүрлі пікірлер мен сауалдарға қатысты өзінің мәлімдемесін жолдайды.

Ибалы, инабатты, білімді ұл мен қыз өсіріп, отаншыл, патриот жастарды тәрбиелеу – әрбір ата-ана мен педагогтың басты мақсаты, ұлы миссиясы екені белгілі.

Қазақстандағы білім беру жүйесі тек қана оқытуды ғана емес, сондай-ақ тұлғаның барлық сұраныстарын толық жүзеге асыру үшін жағдайларды жасауға, оларды өнерге, спортқа, зияткерлік дамуға тартуға бағытталғанын оқушылардың ата-аналары сезінулері керек.

Ислам діні күллі адамзат баласын білім үйренуге үндейді.

Біріншіден, ер кісі мен әйелге білім алу – парыз (міндет). Алла елшісі (оған Алланың салауаты мен сәлемі болсын) бір хадисте: «Әрбір мұсылманға білім алу парыз» деген. Ал балаға зайырлы білімді үйрету – әрбір адамның азаматтық әрі мұсылмандық борышы. Зайырлы мемлекетіміз ұл-қыздарымыздың орта білім алуын міндеттейді әрі осы бағытта барлық мүмкіндіктер мен жағдайларды қамтамасыз етеді. Ата-аналарға қыз баланың міндетті зайырлы білім алуына көбірек көңіл бөлуге кеңес береміз. Сапалы білім – бала болашағының баянды болуына үлкен септігін тигізетінін ұмытпауымыз тиіс.

Екіншіден, Құран және Мұхаммед пайғамбар (оған Алланың салауаты мен сәлемі болсын) хадисі мен мұсылман ғұламаларының бірегей пікірі бойынша, балиғат жасына толған мұсылман қызға орамал тағу – парыз (міндет).

Ал балиғат жасына толмаған қыздың орамал тағуын шариғатымыз талап етпейді. Сондықтан ата-ана кішкентай бүлдіршінді әлі міндет болмаған орамал үшін парыз болған білім алудан тыймауы тиіс.

Нақты айтқанда шариғат талаптарына сәйкес Ислам діні мектеп табалдырығын жаңа аттаған балиғат жасқа толмаған қызға орамал тағуды міндеттемейді.

Үшіншіден, Ата Заңымыз және басқа да заңдар қоғамдық қатынастарды реттейді және азаматтардың бостандығы мен діни сенімдеріне еркіндік береді. Мұсылмандар да Алланың әмірі бойынша заңды сақтайды және оған құрметпен қарайды. Өйткені, зайырлы қоғамдағы заңдар мен ережелер – барша адамның тең құқығын басты орынға қоятын кепілдік құжат және азаматтардың өмір сүру тәртібін көрсететін бағдар.

Қазақстан мұсылмандары діни басқармасы мұсылман жамағатын, ата-аналарды бірлікке үндейді және мектеп басшыларымен ортақ мәмілеге келуге шақырады.

Діни басқарма Алла Тағаладан елімізді түрлі бүліктен сақтап, халқымыздың бірлігі мен ынтымағын нығайтып, берекесін арттыруды тілейді.

6 ПІКІРЛЕР

  1. бұл бұрынғы сауатсыз молдаларға қарап айтылған ғой, мұны кеңес үкіметі жақсы пайдаланып, мысқыл мақалдардың өңін айналдырып алды емес пе. Бұрын ел ішіне іріткі салу үшін сауатсыз бұқар, сарт, қарақалпақ молдаларын көптеп жіберді. Олардың аңдығаны өз құлқыны болды. Екінші патша үкіметі де тыңшылық үшін татар моллаларын тартты, оларға әрине жіберген тарапынан ақы тағайындалып төленіп келді. Мұның мақалдың қазір мәні өзгерді дегенімен жаман, теріс үлгісі халық арасында қалып қойды.

  2. Біз жақта кішкентай кезімде үш молда бар еді. Солардың жүріс-тұрысына қарай-қарай, ел аузында мынандай сөздер үйренішті болып кеткен: бір молда – молда, екі молда – дау, үш молда – төбелес. Ал кәзіргі күндерде әр-бір ауылда тоқсан тоғыз молда дауласып, қырылысып жатады. Неге десем – олар бір-бірін конкурент санайды екен. Дінге баяғыда қазақ онша көңіл аудармаған. Аударған кездерінде де оның дін туралы ой-пікірі мынандай болған: «Дін – қара ін – Религия черная нора, «Молдаға намазды үйреткен тамақ, аюға намазды үйреткен таяқ – Муллу научила намазу ненасытная глотка, а медведя – хорошая плетка»; «Сауатсыз молданың сәлдесі ұзынырақ болады – У муллы-невежды чалма набекрень сидит». Осындай мәтелдер қазақ тілінде өте көп. Мен 30-40-ын білемін. Сонда дін деген не нәрсе? Түсіне алмадым, әйтеу…

    • Ол мақалдар Абайша айтсаң қыртқан макалдар, Қазақша айтсақ жыртқан мақалдар, Орысша айтсам осыртқан и бос ыққан мақалдар. Бауырлар!

    • соғыс кезінде беттері шиқандай қып-қызыл майға бөгіп,жесір-жетім қалған бала-шағаға шапқан қорқау сол жалмауыз молдалар еді ғой,оны өмірденде,әдеби шығармаларданда білесіңдер.есі дұрыс молла көрмеппіз,мысық пен молланың тілеуі бір деп тектен-текке айтылмаған.

  3. Осы түрімен дін адамдары мектепке келіп ақыл үйретпекші. Ал кейбіреулер оны мақұлдайды. Бұл деген масқара ғой…

  4. Қазақстан мұсылмандары діни басқармасы :»Екіншіден, Құран және Мұхаммед пайғамбар (оған Алланың салауаты мен сәлемі болсын) хадисі мен мұсылман ғұламаларының бірегей пікірі бойынша, балиғат жасына толған /етеккірі келген/ мұсылман қызға орамал тағу – парыз (міндет). Ал балиғат жасына толмаған /етеккірі әлі келмеген/ қыздың орамал тағуын шариғатымыз талап етпейді. Сондықтан ата-ана кішкентай бүлдіршінді әлі міндет болмаған орамал үшін парыз болған білім алудан тыймауы тиіс.» Етеккір имам Ағзам мазһабы бойынша, шамамен 9 жастан 55 жасқа дейін жалғасады. Яғни қыздың балиғатқа толуы 9-11 жас аралығында болады. Журналист, тақырыпты дұрыстап қой, «діндар» емес – «дінді ұстанушы».

Пікір жазу

Пікіріңізді енгізіңіз!
мұнда сіздің атыңызды енгізіңіз