Дархан дала дарабозы

МЕМЛЕКЕТТІК СЫЙЛЫҚТЫҢ ИЕГЕРІ, ЖАЗУШЫ СӘБИТ ДОСАНОВ ТУҒАН ЕЛ ҚҰШАҒЫНДА

Академик Серік Қирабаев: «Күні бүгінге дейін жалпы көлемі 30 томдай көркем шығарма жазып жарияланған Сәбит шығармашылығы біздің ұлттық әдебиетіміздің бағалы үлгілерінің бірі» деп бағалаған жазушы Сәбит Досановтың 75 жасқа толған мерейтойы туған жері Қостанай облысында жалғасты. Облыс орталығындағы «Мирас» мәдениет сарайында өткен салтанатты кеште облыс әкімі Нұралы Сәдуақасов кіріспе сөз сөйлеп, қазақы дәстүрмен жазушының иығына шапан жауып, темір тұлпар сыйлады.

Туған жеріне келген Сәбитіне өз елі де зор құрмет көрсетті. Бастауын сонау Мәскеуден алған бұл іс-шара Қырғыз елінде тойланса, өзі тұрып жатқан Алматыда он екі елдің құрметті қонақтарының қатысуымен аталып өткені белгілі. Елбасымыз Нұрсұлтан Назарбаевтың құттықтауын алған жазушының мерейтойы Қостанай қаласында жалғасты. Жазушының туған елі Байғабыл топырағында ата-баба рухына тағзым етіліп, құран оқылды, ас берілді. Аманкелді ауданының орталығындағы Қазыбек Әбенов атындағы Мәдениет үйіндегі салтанатқа жазушының достары, Ресей елінің ақындары Л.Щипахина, Н.Попова, Әзірбайжан жазушылары И.Хасиев, Э.Маммадов, сонау Түрік елінен Ш.Назми, өзбекстандық М.Исламқұлов, Қырғыз Республикасындан А.Абдықалықов, М.Ааматов арнайы бірге еріп келіп жазушымызға деген ыстық ықыластарын білдірді. Қазақтың тұңғыш ғарышкері, Кеңес Одағының Батыры, Халық қаһарманы Тоқтар Әубәкіров бастаған көрнекті тұлғалар, Қазақстанның Халық артисі Нұрғали Нүсіпжанов қостаған өнерпаздар мен ақын, жазушылар мерейтойдың салтанаты мен салмағын арттыра түсті. Қазақтың белгілі ақындары Қасымхан Бегманов пен Қазыбек Иса бастаған ақын-жазушылар Сәбит Досановқа арнаған өлеңдерін оқып, мерейтой иесімен қоса қалың жұртшылықты да риза етті. Бұл мерекелік шараға жазушының жары, академик Құралай Аққошқарова да қатысты. Жиынды барысында ақынның туған жері Аманкелді ауданының әкімі Жасұлан Тәукенов шапан жауып, тұлпар мінгізді. Көршілес жатқан Жанкелді ауданы әкімі мен Арқалық қаласының әкімдері Асқарбек Кенжеғарин мен Ғазиз Ерболатұлы да қуанышқа ортақтасып жазушыға бір-бір сәйгүлік мінгізді. «Кейбір елдер соғыс өртіне орнып, алпауыт державалардың өзі қайыршылық халге жеткен мына қиын кезеңде дүрілдетіп той өткізу Елбасы Н.Ә.Назарбаевтың дана саясаты мен еңбеккер халқымыздың кеңпейілдігінің шапағаты екендігі шығар күндей шындық» деп ағының жарылды мерейтой иесі. Салтанатты кеште от ауызды, орақ тілді сатирик Көпен Әмірбектің айтқан әзілі көпшіліктің көңілін бір көтеріп тастады. Осы шараның аясында Аманкелді ауданының күн батысында дайындалған арнайы алаңда ат жарысы, аударыспақ, қыз қуу, көкпар сияқты қазақтың ұлттық ойындары ұйымдастырылды. Мәдениет үйінде өткен салтанатта жазу­шының сыныптасы, өзі де 75-ке келіп отырған атақты Құтжан ақынның қызы Төлеутай жыр арнап, ел ақсақалы Мұхтар Қоденұлы ақ батасын берді. Жазушының мерейжасына орай Аманкелді ауданында өткен іс-шаралардың басы-қасында облыс әкімінің орынбасары Мұрат Дәрібаев пен облыстық мәслихаттың хатшысы Сайлаубек Есжанов және бұқаралық ақпарат құралдарының өкілдері болды. Орайы келгенде айта кету керек, осы салтанатты шара барысында жазушы Сәбит Досанов Аманкелді ауданының орталық кітапханасына бес жүз кітап сыйлады. Сол бес жүздің арасында жазушының «ХХ ғасыр» роман-эпопеясы бастаған өз шығармаларымен бірге әлем әдебиетінің жауһарлары да бар.

Сүгірбай НҰРМАН, Арқалық қаласы, «Қазақ үнінің» тілшісі