Траги-фарс жанрындағы алғашқы қойылым
2021 ж. 16 маусым
2375
0
Нұр-Сұлтан қаласы әкімдігінің Музыкалық жас көрермен театры көрнекті жазушы-драматург Михайл Булгаковтың 130 жылдығына орай «Өлі жандар» (Н.В.Гоголь поэмасы негізіндегі траги-фарс) қойылымның премьерасын көрермен назарына ұсынды.
Жаңа қойылымның шымылдығын Қазақстанның еңбек сіңірген қайраткері, театрымыздың директоры Асхат Маемиров көрерменге бүгінгі театрымыздың қонақтарын таныстырып, М.Булгаковтың «Өлі жандары» қазақ сахнасы кеңістігінде тұңғыш рет қазақша сөйлегелі тұрғанын айтты.
– М.Булгаковтың «Өлі жандары» қазақ сахнасы кеңістігінде тұңғыш рет қазақша сөйлегелі тұр. Сондықтан да әлемге ортақ әйгілі әдеби драмаларды қалдырған ұлы драматургке деген біздің жастарымыздың тағзымы деп есептесек болады», – деді А.Максимұлы.
М.Булгаковтың «Өлі жaндap» пьесасы өмір сүруге деген құштарлықтарын ашатын туынды. Сонымен қатар, қоғамның өзекті мәселелерін көтеріп, оларға өзіндік шешім де айтады. Солардың бірі – сыбайлас жемқорлық. Ол өз кезегінде, мемлекетті құлдыратып, жетістіктерді жоққа шығарып, адамдардың рухани өміріне қауіп төндіретін індет. Бұл – барша адамзатқа ортақ шындық. Туындыда өзекті мәселелер ащы әзілмен, ойлы күлкімен айтылып, көрерменді шынайылық, адалдық әлемінің тереңіне бойлатады.
Премьерадан кейін театрымыздың жанашырлары өз ойларымен бөлісіп, театр жастарының ізденімпаздығын, жаңашылдығын жоғары бағалады.
Ақиқат пен жалғандықтың ара жігін ашып көрсететін, әр көрерменнің бойына парасаттылықтың негізін қалайтын, өмірді сүюге баулитын бүгінгі «Өлі жандар» премьерасы туралы және Музыкалық жас көрермен театрының бүгінге дейін сахналанған басқа да репертуарлары жайында Қазақстан Республикасының Парламенті Мәжілісінің депутаты Әлия Әбсеметова:
– «Жас театрдың ұжымына, жастарға алғысымды айтқым келеді. Себебі, өзім Музыкалық жас көрермен театрының туындыларымен өте жақсы таныспын. Қойылымдарына, премьераларына жиі келіп тұрамын. «Шәмші» мюзиклінде өмірі қиындыққа толы болған Шәмшінің тұлғалық қасиеттерінің ашылғанын көріп әнмен тербелсек, «Дүние-Ғапыл» метафизикасында барша адамзатқа ортақ тақырыпты сөз ететін адам өмірінің қаншалықты маңыздылығын алға тартатын туынды екенін көрдік!» – деді.
Рольдерде: Чичиков ролін – «Дарын» мемлекеттік жастар сыйлығының иегері Асылхан Төлепов пен Аман Ғұмаров, Манилов – Абзал Арапов, Михаил Семенович Собакевич – Азамат Болатов, Плюшкин – Ақәділ Иманғали, Ноздрев – Қазыбек Есқара, Настасья Петровна Коробочка – Мақпал Дүйсен, Илья Ильич – Шалқар Мұралтай, Полицеймейстер – Саламат Мұқашев, Қамқоршылық кеңесінің хатшысы – Талғат Кеңес, Мавра – Альфия Хайзуллиева, Мижуев – Әлихан Әлішер, Петрушка – Еламан Иманбаев, Селифан – Аққанат Қуандық.
Әділғазы Бақытұлы
qazaquni.kz