Еліміздегі зейнетақы жүйесіне ауқымды өзгеріс енді. 2017 жылдан бастап базалық зейнетақы еңбек өтіліне қарай төленетін болды.

Парламенттің қос палатасы  мақұлдап, Ақордаға жіберген құжатқа бүгін Нұрсұлтан Назарбаев қол қойды, - деп хабарлайды КТК арнасы.

Енді, егер еңбек өтілі 10 жылдан аз немесе мүлдем болмаса, онда базалық зейнетақының мөлшері ең төменгі күнкөріс деңгейінің тең жартысы, яғни  10 мың теңгеден сәл-ақ асады.

Ал, еңбек өтілі бұдан жоғарыларға зейнетақы бөлек есептелмек. Сондықтан қарттығын қамсыз өткізгісі келгендер тыным таппай еңбек етіп, қорға ай сайын қаржы аударып тұруы тиіс. Сондай-ақ жаңа заң бойынша, қазақстандықтар 3 деңгейлі зейнетақы алатын болады.

Базалық, жұмыс берушілердің 5 пайыздық жарнасынан төленетін зейнетақы және әркімнің жеке 10 пайыздық жарнасы. Сонда зейнетақыға үш тарап: мемлекет, жұмыс беруші мен азаматтардың өзі жауапты болады.

Дереккөз: КТК арнасы