"Шахтердің" жеңілісі

Қарағандының «Шахтері» Еуропа лигасының өз алаңындағы соңғы ойынын Астанада өткізіп, Грекияның ПАОК командасынан 0:2 есебімен ұтылып қалды. Биылғы жылы Чемпиондар лигасынан басталып, Еуропа лигасына жалғасқан «Шах­тердің» Еурододадағы бұл маусымы тамамдалып келеді. Бұл Қарағанды клу­бының Еурокубок аясында өз жерімізде өт­кізген алтыншы кездесуі болатын. Кен­шілер соның алғашқы үшеуін – жеңіспен, ал кейінгі екеуін тең аяқтап еді. Енді, міне, Ас­та­нада бірінші рет жеңіліске де ұшы­ра­ды. Сонымен қатар «Шахтер» бірінші рет өз алаңында гол соға алмады. Өз жерімізде өткізген ойындарында БАТЭ, «Скендер­беу», «Селтик» секілді азулы клубтардың өз­дері Мокиннің осал тұсын таба алмай кетіп еді. Сол мақтаулы Сашамыз бүгін ал­ғашқы гол соғылған кезде жаза басып, қапелімде қателесті. ПАОК біз үшін ыңғайсыз қарсылас бол­ды. Алғашқы ойынның соңғы мину­тын­да же­ңісті жұлып алса, бұл жолы өзде­ріне ке­рек нәтижеге аса қиналмай қол жеткізді. Бы­лай қарасаңыз, әкетіп бара жатқан түгі жоқ. Әйтеуір, грек командасы­мен болған қос ойында да жолымыз бол­ма­ды. Қыр­сық шалғанда, екі матчта да не­гізгі орта­лық қорғаушы Никола Василевич алаңға шы­ға алмады. Мүмкін, босниялық легио­нер бол­ғанда, есеп басқаша болар ма еді? Ежелгі Эллада жерінде өткен алғашқы ойында Кумыковтың тарапынан сынға ұшыраған капитан Андрей Финонченко бұл жолы тағы да жарқырап көзге түсе ал­ма­ды. Әйтпесе Еуропа лигасының өз ала­ңымызда өткен қос ойынында есеп ашып жанкүйерлерін желпіндіріп жүр еді. Ауттан доп лақтырудың шебері Геди­ми­нас Виючстың бұл ойындағы қос қол­дап, ытқытып жіберетін пастары да мар­дымды бола қоймады. Андрей Финончен­ко, Сергей Хижниченко, Геворг Казарян, Рохер Каньяс секілді футболшылары­мыз­дың гол соғатын мүмкіндіктері болған еді. Бірақ бұл күні қақпашы Гликостың осал тұсын табу мұң болды. Ойыншыларды жиі ауыстыра бергенді жақсы көрмейтін Виктор Кумыков осы жолы үш бірдей ойыншысын алмастырды. Жаз бойы жарақатына байланысты алаңға шықпаған Станислав Лунин Еурокубоктағы алғашқы ойынын өткізді. Жерлестеріміз Лукас соққан бірінші гол­дан кейін бірнеше қауіпті шабуыл ұй­ымдастырды. ПАОК қақпашысының зә­ре-құтын қашырғанымен, футболшыла­ры­мыз допты қақпаға тоғыта алмай, дал болды. Футболдың «сен соқпасаң, саған соға­ды» деген жазылмаған қағидасы 90-ми­нут­та екінші мәрте орындалды. Қарымта шабуылда шеберлік танытқан Кициу ПАОК-қа бұл кездесудегі түпкілікті жеңісті сыйлады. Қорытынды есеп – 0:2. «Шахтер» енді Еуропа лигасындағы соңғы кездесуін 12 желтоқсанда Израильдің Хайфа қаласын­да жергілікті «Маккаби» клубымен өткі­зеді. Виктор КУМЫКОВ, «Шахтер» командасының бас бапкері: – Өзекті өртейтін өте өкінішті жеңіліс болды. Бізге бүгін жеңіске же­ту­ге сәттілік жетіспеді. Әйтпесе үш-төрт гол соғатын мүмкіндігіміз болып-ақ еді. Шабуылдағы Хижниченко, Каза­рян, Финонченко үштігі өз жұмыстарын дұрыс атқарған жоқ. Бұл жеңіске жете ал­мауымыздың басты себебі деп біле­мін. Алғашқы жеңісімізге қол жеткізе­міз деп күткен едік, бірақ ойымыз жү­зе­ге аспады.  Жалпы, грек командасының фут­бол­шыларының деңгейі біздің ойын­шыларға қарағанда жоғары. ПАОК-пен өткен қос матчта да жеңіске жете алмауымыздың бір сыры – осында. Енді келесі маусымда бұдан да жақсы ойын көрсетіп, жаңа жетістіктерге қол жеткізетін боламыз. Ал осы ойындағы ұтылысқа байланысты жанкүйерлерден кешірім сұраймын.   «Шахтер» (Қарағанды) – ПАОК (Салоники, Грекия) – 0:2 Голдар: Лукас, 54. Кициу, 90. Ескертулер: Каньяс 25, Порываев 41, Лазэр 71. «Шахтер»: Мокин, Порываев (Байжа­нов, 83), Тарасов, Джидич, Малый, Сим­чевич, Вичюс, Казарян (Лунин, 66), Кань­яс, Финонченко, Хижниченко (Зенькович, 76). ПАОК: Гликос, Цавеллас, Лино, Цио­лис, Стох (Вукич, 78), Лазэр, Кацуранис, Ки­циу, Нинис (Салпингидис, 83), Лукас (Нецид, 90), Атанасиадис. Бас төреші: Серж Гюмьенни (Бельгия).

"Алаш айнасы" газетінен