Тоқаев Ақтөбе облысына жұмыс сапарымен барды

Қазақстан президенті Қасым-Жомарт Тоқаев Ақтөбе облысына жұмыс сапарымен барды, - деп хабарлайды sputniknews.kz.

"Қазақстан президенті Қасым-Жомарт Тоқаевтың Ақтөбе облысындағы жұмыс сапары басталды. Мемлекет басшысы бірқатар әлеуметтік және өндірістік нысандарды аралайды", - деп хабарлады президенттің баспасөз хатшысы Берік Уәли Facebook-тегі парақшасында.

Сондай-ақ, Тоқаев сапар барысында "Халықтың денсаулығын сақтау: саясат, ғылым, білім, алғашқы дәрігерлік-санитарлық көмек практикасы" атты халықаралық ғылыми-тәжірибелік конференциясына қатысып, өңірдің жұртшылығымен кездеседі.

Айта кетсек, кеше президент Қостанай облысында жұмыс сапарымен болды. Ол Қазақстан-Ресей жастарының ынтымақтастығы форумына қатысып, өңірдің бірқатар кәсіпорыны мен шаруа қожалығын аралап көрді. "СарыарқаАвтоПром" автомобиль құрастыру кәсіпорнында болып, Қостанай қаласы әкімдігі қоғамдық қабылдауының жұмысымен танысты.