Қазақ тілі жаңа жаһандық кезеңге сай дамымақ

ҚР Мәдениет және спорт министрлігі Тілдерді дамыту бағдарламасының аясында «Жаңа жаһандық кезеңдегі қазақ тілі» IT-тұсаукесер рәсімін өткізді. «Astana Hub» халықаралық технопарк алаңында өткен жаңа IT-жобалардың ресми тұсаукесеріне қоғам қайраткерлері, жазушылар, тіл мамандары, әдіскерлер және Парламент Мәжілісінің депутаты, «Ақ жол» фракциясының жетекшісі Азат Перуашев қатысты. Таныстырылым барысында ҚР МСМ Шайсұлтан Шаяхметов атындағы «Тіл-Қазына» ұлттық ғылыми-практикалық орталығы латын негізді қазақ әліпбиін үй­ре­туге бағытталған заманауи ин­но­вациялық технологиялар ұсынды. Сонымен қатар, Алаш көсемі Әлихан Бөкейханның тұлға­лық энциклопедиясы, сондай-ақ Е.Омарұлы, Ә.Қайдар, Р.Сыз­дықова, Ш.Сарыбаев сынды ғылым қайраткерлерінің ғылыми-танымдық еңбектері, Ә.Жүнісбектің «Қазақ тіл білімінің мәселелері», З.Күзекованың қазақ тілін оқытуға арналған деңгейлік оқулықтары, белгілі полиглот Д.Петровтың әдістемесі мен қазақ және ағылшын тілдерін үйретуге арналған оқу құралдары таныстырылды. «Бізге Алаш институтының Дихан Қамзабекұлы, Сұлтан-Хан Аққұлыұлы бастаған жетекшілері мен ғалымдары Әлихан Бөкейхан­ның және басқа да Алаш қайрат­керлерінің еңбектерін жинап, бас­падан шығарсақ па деп ұсыныс жасаған еді. Осы орайда, біз Үкі­метке бірнеше депутаттық сауалдарды жолдадық. Мәдениет министрлігіне ұсныныс жасадық. Бұл – мемлекеттік маңызы бар, мәні бар бастама. Нәтижесінде, міне, Мәдениет және спорт ми­нистрінің, сондай-ақ Қаржы ми­нистрлігінің қолдауымен бұл кітаптар жарыққа шықты. Менің­ше, бұл да бір үлкен жетістік. Себебі, бұлар – Тәуелсіздігіміздің алғашқы қарлығашы деп айтсақ болады», – деп атап өтті тұсаукесерде сөз сөй­леген депутат Азат Перуашев. Келген қонақтар мен қа­тысушыларға веб-порталдар мен платформалар, мобильді қосымшалар, іздестіру жүйелері, ани­мациялық фильмдер, энци­клопедиялық, танымдық веб-сервистер көрсетілді.

qazaquni.kz