ФОТОБАЯН

Назарбаев Қазақстан құрамасын Универсиадада сәтті өнер көрсетуімен құттықтады

2017 ж. 08 ақпан

1904

[caption id="" align="aligncenter" width="688"]

Алматыда Универсиада-2017 ойындарының жабылу салтанаты өтіп жатыр, - деп хабарлайды Tengrinews.kz тілшісі. Шоу "Алматы Аренада" өтті.

Мемлекет басшысы 28-ші Бүкіләлемдік қысқы Универсиадада жоғары көрсеткішке жеткен ұлттық құрама мүшелерін құттықтады.

"Сіздердің қайсарлықтарыңыздың арқасында Қазақстанның жалпы командалық екінші орынға қол жеткізуі - елдің биік беделінің, бұқаралық спорттың дамығандығының айқын көрсеткіші. Қазақстанның спорт мектебінің даңқын тағы бір мәрте асқақтатып, жоғары дайындықтарыңызды, жеңіске деген ұмтылыс пен ерік-жігерлеріңізді көрсеттіңіздер. 2017 жылғы универсиада барлық қазақстандықтар үшін нағыз мерекеге айналды. Спортшыларымыздың жеңісі қысқы спорт түрлерін одан әрі дамытуға серпін беріп, келер ұрпаққа үлгі болуға тиіс. Универсиаданың ұйымдастыру комитетіне жарысты жоғары деңгейде өткізіп, жауапкершілік танытқаны үшін алғыс айтамын. Барлық спортшыларға мықты денсаулық және жаңа белестерді бағындыру жолында табыс тілеймін!", - деп келтіреді Назарбаевтың сөзін Ақорданың баспасөз қызметі.

Өткен жарыстардың қорытындысын Қазақстанның премьер-министрі Бақытжан Сағынтаев жариялады. Ол бюджет қаражаты үнемделсе де, 28-ші Қысқы Универсиаданың жоғары деңгейде өткенін атап өтті. Сондай-ақ үкімет басшысы ойындарды миллиардтан аса телекөрермен мен жанкүйердің қарағаны жайлы мәлімет келтірді.

Алматыда Қысқы Универсиада ойындарының жабылу салтанаты өтті (фото)

Ал өз кезегінде Халықаралық студенттер спорты федерациясының президенті Олен Матыцин Алматының ойындарды өткізуге жоғары деңгейдегі жағдай жасағанын атап өтті. "Ерекше көңіл-күй Алматыдағы Универсиаданы ерекше етті. Универсиада тарихында мұндай қонақжай әрі ынталы аудитория кездеспеді", - деді ол.

Шара барысында Алматы Халықаралық студенттер спорты федерациясының (FISU) алауын ойындарды 2019 жылы өткізетін Красноярға табыстады.

Алматы әкімі Бауыржан Байбек Красноярға Универсиаданы 2019 жылы лайықты деңгейде өткізуді тілеп, тәжірибе бөлісуге уәде берді.

Еске салайық, Универсиаланың медальдар есебінде Қазақстан 36 медальмен екінші орын алды - 11 алтын, 8 күміс және 17 қола медальдар. Бірінші орынды 29 алтын, 27 күміс және 15 қола медаль жеңіп алған Ресей құрамасы алды.