Асқар Мырзахметов ірі жер иеленушілердің атын атаудан бас тартты

Қызылорда облысында өтіп жатқан жер реформасы бойынша қоғамдық комиссияның отырысында журналист Жанарбек Әшімжан ірі жер иеленуішілері туралы ақпаратты ашық түрде жариялау мәселесін көтерді.

Бұл туралы Baq.kz хабарлайды.

Себебі Райымбек ауданының өзінде барлық жерді төрт-ақ адам бөліп алған.

«Ел қыстаудан жайлауға көше алмайды. Жолға дейін меншіктеп алған», - дейді Жанарбек Әшімжан.

Айта кетейік, осыдан екі апта бұрын Алматы облысында өткен комиссия отырысында осы мәселені экономист ғалым, профессор Кенжеғали Сағадиев те көтерді.

«Әй, осы 1,3 млн гектарды саттық. Кімге саттық? Кімдер олар? Қанша жерлері бар? Олар не істеп жатыр? Қайда тұрады? Осы туралы бір ақпарат бар ма? Жоқ па? Егер осының барлығы дұрыс болса, ары қарай сатуға болады. Ал егер бұның ішінде көптеген бұрмалаушылықтар болса, онда жабылу қазан жабулы, жерді сатпай, ең кемі, мараторийді 10 жылға ұзартып жіберу керек», - деді Кенжеғали Сағадиев.

Комиссия отырысында ауыл шаруашылығы министрі әрі үкімет басшысының орынбасары Асқар Мырзахметов осы сауалға жауап берді.

«Бұл мәселе бұған дейінгі отырыстарда да көтерілген. Ал, енді, ол тізім (ірі жер иеленушілері – авт.) қазір міне толық анықталуға жақын. Бірақ бұл жерде бір мәселе бар. Біз енді заңды да ескеруіміз қажет. Заңды да құрметтеуіміз керек. Заңды айтылған, ол меншік иесенің келісімі болса, сонда ғана оны жариялауға болады, яғни ол жерде белгілі дәрежеде шектеу бар. Қазір біз сол жөнінде келісіп жатырмыз. Егер олардың келісімі болған жағдайда оны жариялауға болады. Ал егер келісім болмаған жағдайда заң жағынан белгілі бір проблемалар туындауы да мүмкін», - дейді Мырзахметов.

Айта кетейік,  отырысты ашқан комиссия төрағасы Асқар Мырзахметов бұған дейін өткен кеңестер жайында айта келе: «Өткен жолы да нақты шешімдерді жасауға қатысты бірақ ұсыныстар айталды. Сондықтан бүгінгі отырыста нақты шешімдерді жасап, пәтуаға келейік деген ұсыныс бар. Ауыл шаруашылығы министрлігі өз тарапынан тиісті шешімдерді әзірлеп қойды», - деп атап көрсетті.