Нұрлан Жоламановтың ісі бойынша сот тергеуі аяқталды
2015 ж. 18 ақпан
1932
1
Аса ірі көлемде пара алды деп айыпталған Қазақстан ҰҚК Шекара қызметінің бұрынғы басшысы Нұрлан Жоламановтың ісі бойынша сот тергеуі аяқталды. Сот тараптарды пікірсайысқа даярлау үшін үзіліс жариялады.
"Сот осы іс бойынша сот тергеуінің аяқталуы туралы үкім шығарды. 23 ақпан, сағат 11:00-ге дейін үзіліс жарияланды", - деді судья Ербол Ахметжанов.
Еске сала кетейік, 26 қаңтар күні Астанада ҚР ҰҚК Шекара қызметінің бұрынғы басшысы Нұрлан Жоламановтың ісі бойынша сот отырысы басталған еді. Істің бір фигуранты - Алматыдағы №2458 әскери бөлімнің командирі Қайрат Балмағамбетов.
Жоламанов пен Балмағамбетов ұйымдасқан қылмыстық топ құрды және аса ірі көлемде пара алды деп айыпталып отыр. Айып бойынша Жоламанов 300 мың доллардан астам пара алған, ол 2014 жылдың қазан айынан бері қамауда.
Оның алдында сотта Жоламанов өзіне тағылған айыпты мойындамады, ол мұны саяси тапсырыс деп атады. Балмағамбетов кінәсін толық мойындап, өкініш білдірді.
