Жамбыл облысында 1 ғана үш ауысымды мектеп қалып отыр

Жамбыл облысында «Келешек мектептері» ұлттық жобасы кезең-кезеңімен жүзеге асырылып келеді. Жоба аясында жаңа оқу орындары салынып, оқушыларға заманауи әрі қолайлы білім ортасы құрылуда.

Мемлекет басшысының білім саласындағы бастамаларын жүзеге асыру шеңберінде Жамбыл облысында «Келешек мектептері» жобасы аясында 2023 жылы 7 мектептің құрылысы басталып, оның 3-еуі 2024 жылы пайдалануға берілді. Атап айтсақ, Байзақ ауданында 1 мектеп берілсе, Тараз қаласында Бәйтерек және Ұлы дала мөлтек аудандарында 2 мектеп оқушылар игілігіне берілді. Нәтижесінде Тараз қаласындағы №3 мектеп-лицейінде үш ауысымда оқыту мәселесі шешілді. Жоба аясында 2025 жылы Ұлы дала мөлтек ауданында 2000 орындық 1 мектеп пайдалануға берілді. 

Бүгін Байзақ ауданында аталған жоба аясында салынған алғашқы мектеп – №7 орта мектепте Ашық есік күні өтті. Бұл – Сарыкемер ауылында орналасқан, 600 орынға арналған білім ошағы. Мектеп 2024 жылдың 1 қыркүйегінде қолданысқа беріліп, бүгінде мұнда 72 педагог қызмет етеді. Мектептің директоры – Есентаева Гүлмира Әуесбайқызы. Жаңа мектептің материалдық-техникалық базасы толықтай заманауи талаптарға сай жабдықталған. Мұнда 35 оқу кабинеті, 132 орындық мәжіліс залы, 176 орынға арналған асхана, үлкендігі әртүрлі екі спорт залы, екі лингафон кабинеті, химия, физика және биология пәндеріне арналған үш зертхана бар. Сондай-ақ кітапхана (16 орындық оқу залы), екі компьютер кабинеті және ұлдар мен қыздарға арналған шеберханалар қарастырылған.

Ашық есік күніне ата-аналар, қонақтар мен БАҚ өкілдері қатысып, мектептің материалдық-техникалық базасымен, оқушылардың оқу жетістіктерімен және шығармашылық жұмыстарымен танысты. Балаларға арналған ойын-сауық бағдарламасы ұйымдастырылып, олардың жаңа ортаға бейімделуіне жағдай жасалды.

«Келешек мектептері» жобасының басты мақсаты – үш ауысымды оқытуды жою, апатты мектептердің мәселесін шешу, сондай-ақ балалардың сапалы білім алуына заманауи, қауіпсіз және қолайлы жағдай жасау.

Алдағы уақытта Жамбыл облысында да осы жоба аясында тағы 3 мектептің құрылысы аяқталады. Бүгінде Жамбыл облысында 1 ғана үш ауысымды мектеп қалып отыр – Қордай ауданы, Қарасу ауылындағы №7 орта мектеп. Мұнда оқушы санының артуына байланысты үш ауысымды оқыту жүйесі енгізілген. 2025 жылы «Жайлы мектеп» ұлттық жобасы аясында жаңа мектептің салынуы бұл мәселені түбегейлі шешуге мүмкіндік береді. Осылайша, өңірде үш ауысымда оқыту тәжірибесі толығымен жойылады. Бұл өңірде білім беру сапасын арттыруға, оқушыларға қолжетімді әрі заманауи білім ордаларын ашуға үлкен мүмкіндік бермек.