Оңтүстік Кореядан келген 100 адам Алматыда карантинге жатқызылды

Медициналық мекемелерге жеткізілген 100 адам алдағы 14 күн бойы карантинде болады, деп хабарлайды Денсаулық сақтау министрлігі.

«2020 жылдың 4 наурызында шыққан Бас мемлекеттік санитардың қаулысымен коронавирус инфекциясы бойынша (COVID-19) 1а санатындағы (ҚХР, Оңтүстік Корея мен Иран) мемлекеттерден келген азаматтар жергілікті атқарушы органдар айқындаған орында үзіліссіз 14 күндік карантинге жатуға міндетті. 2020 жылдың 5 наурызында сағат 15.50-де Сеул-Алматы ұшағымен 197 адам ұшып келді. Олардың ішінде транзитпен келгендердің саны 97 (Қырғызстан – 23, Өзбекстан – 37, РФ – 16, Украина – 18, Оңтүстік Корея – 2, Тәжікстан - 1)», - деп хабарлайды Денсаулық сақтау министрлігінен.

Министрліктің мәліметіне сәйкес, өз азаматтары үшін арнайы автобус шығарған Қырғыз Республикасы 21 азаматын өз еліне алып кеткен. «Жалпы медициналық мекемелерге 100 адам (оның ішінде төртеуі бала) жеткізілді. Оқшауланған адамдардың бәрі де медициналық бақылауда. Карантин уақыты 14 күнге созылады. Осы уақытта карантиндеу орнын тастап кетуге болмайды. Режімді бұзған адам әкімшілік жауапкершілікке тартылады», - деп хабарлайды министрліктен.