«Сандық Қазақстан» бағдарлама жобасын сынға алды

«Ақ жол» Үкіметтің «Сандық Қазақстан» бағдарлама жобасын сынға алды: Азат Перуашев тұтыну нарығының мәселелері туралы фракцияның тиісті депутаттық сауалын жолдады. Фракция жетекшісі Елбасының биылғы Жолдауда және Астана экономикалық форумы барысында берілген экономиканы технологиялық жаңғырту және цифрландыруға кірісу тапсырмалары туралы еске салды. – Бұл бастама тұтыну на­рығын ынталандыруға тікелей байланысты, деді жетекші, – мысалы, онлайн-сауданы дамыту, мобильді банкинг, крипто-валютаны енгізу тұрғысынан, т.б. Ол сұраныс пен ұсыныс алгоритмі бар қолданыстағы тәсілдерді түбегейлі өзгертуге қабілетті, өндірісте іргелі өзгерістер мен өнімдердің жаңа түрлерінің пайда болуына әкеледі... Сондай-ақ ол «Сандық Қазақстан-2020» мемлекеттік бағдарламасының кейбір индикаторларына сілтеме жасады, атап айтқанда: – 2020 жылға дейін ғаламтор пайдаланушылар санын – 81%-ға ( 4%-ға) дейін өсіру; – халықтың сандық сауаттылық деңгейін – 81,5%-ға ( 6%-ға) дейін арттыру; – кең жолақты үй желі қатынасын ғаламторға енгізу деңгейін – 82%-ға ( 4%-ға) дейін арттыру; – ЖІӨ-нің жалпы көлемінде ақпараттық-коммуникациялық технологиялар секторының тауарларды (қызметтер) өндіру және сату үлесін – 4,9%-ға (0,7%-ға) дейін өсіру; – бөлшек сауданың жалпы көлемінде электрондық сауда үлесін 0,4%-ға ұлғайту және т.с.с. «Әлбетте, 4-6 %-ға өсім Пре­­зи­дент атап көрсеткен «Эко­но­­ми­калық өсу сипатын түбе­гейлі өзгерту» және «жаңа экономикалық модельге ауысу» міндеттер ауқымына сәйкес келмейтіні анық. Елбасы сандық технологияны пайдалана оты­рып, экономиканың жаңа салаларын құрудың, сондай-ақ елімізде 3Д-принтинг, онлайн-сауда, мобилді банкинг, сандық қызмет көрсету және басқалары секілді перспективті салаларын дамытудың жоғары жүйелі мақсаттарын белгілеп берді, – деп есептейді көшбасшы. Мәселен, Бағдарламаның жобасында экономикалық ак­тивтердің жаңа құрылым­дарын сапалы қалыптастыру, өндірістің, сауда және қызметтің сандық ұйымдастыру тәсілдері, өндірістік және әкімшілік процесстерді цифрландыруға енгізу үшін экономикалық ынталандыруды құру сияқты өзекті бағыттар жоқ. Ақжолдықтардың ойынша, дәл осы тәсілдер таяу жылдары тұтыну нарығында бәсекеге қабілетті жағдайды қалыптастыратын болады. Отандық немесе шетелдік өндірушілердің пайдасына миллиардтар мен триллиондарды бөлу тура осыларға тәуелді. Осыған орай, «Ақ жол» фракциясы Үкіметке эконо­миканы цифрландыру бағдар­ламасы барысында қазақ­стан­дық тауарлардың сапасын айтарлықтай жақ­сарту, шығындарды азайту, отандық бизнесті соңғы техноло­гия­лардың жаһандық желісіне енгізуді және жаңа индустрияны құру жөнінде қадамдар жасауды ұсынады. «Ақ жол» ҚДП парламенттік фракциясы сайлауалды бағдарламаларын жүзеге асыру және қазақстандық тауар өн­дірушілердің мүдделерін қорғау жұмыстарын жалғас­тыруда. qazaquni.kz