ИСЕКЕШЕВКЕ ИТ ҚАЙҒЫ

Бірақ мені ЭКСПО-2017 ашылуы алдында елорданы қаңғыбас жандардан тазарту туралы қала әкімінің орынбасары Андрей Лукиннің бастамасымен Астанадан аластатылған жарты мыңдай БОМЖ (белгілі орын-мекенсіз жандар) тағдыры алаңдатады. Кейбір деректерде астаналық бомждар Қарағандыға, тіпті Көкшетауға апарылып тасталынған. Байғұстардың енді ұлы дала кіндігіне қайтып оралуына мүмкіндіктері де, ақшалары да жоқ. Бұл да адамдарды қорлаудың бір түрі ғой. Қаңғыбас болса да сол Азаматтар ит пен мысықтан гөрі мемлекетке қымбат емес пе?! Тіпті ҚР Конституциясында адам өмірі мен оның бостандықтары ең басты құндылықтар екені айтылатыны қайда?! Сонда Ит пен Мысықты ардақтаймыз да, түрлі жағдайлармен баспанасыз, қамқорлықсыз қалған адамдарды бұралқы күшіктен де төмен көргеніміз бе?

БОМЖ-дар проблемасы Қазақстан үшін өте өзекті. Олар да адамның баласы. Оларды көбін қаңғыбастыққа ұшырататын әлеуметтік, экономикалық жағдай, әсіресе – құжатсыздық. Түрлі себептермен құжаттарынан, үйінен айырылып қалған адамдар мемлекеттің көмегіне мұқтаж. Біздің елімізде тағдыр тәлкегіне ұшыраған жандардың кім екендігін анықтау, құжаттандыру, уақытша болса да баспаналы ету, емдеу, мамандыққа оқыту, мәжбүрлеп болса да еңбек тәрбиесіне тарту сияқты баптары болатын арнайы заң қабылдайтын кез баяғыда жеткен. Үйсіз-күйсіз жүрген қаңғыбастарды пайдалы қоғам мүшелеріне айналдыру арқылы мемлекет өзінің гуманистік міндеттерін жүзеге асырар еді. Депутаттар қоғам үшін осындай маңызды заң жобасына бастамашы болса қанеки?!

Әйтеуір төрт аяқты итті екі аяқты Адамнан артық көрмейікші?!