Елімізде Қазақ хандығының 550 жылдық мерейтойына орай компьютерлік ойын жасалып жатыр. Жоба тарихты насихаттау мақсатында қолға алынып отыр.

Қобыланды батыр, Қорқыт ата секілді ұлы тұлғалармен қатар аңыз-ертегілердегі Жалмауыз кемпір де ойында көрініс тауыпты.

Сондай-ақ жобада ұлттық нақыштағы киіз үй бейнеленген. Компьютерлік ойынды жасау үшін Білім және ғылым министрлігі мен Дүниежүзілік банк қолдау білдіріп, 72 миллион теңге бөліпті.

Жоба келер жылы қолданысқа берілмек. Егер көпшіліктің көңілінен шығып жатса, онда мобильдік нұсқасы да шығарылатын болады.

“Қазіргі жастар кітапханаға бармайды. Олар қажетті ақпаратты ғаламтордың көмегімен біліп отырады. Әсіресе компьютерлік ойындарды көп пайдаланады. Мәселен Батыста ойын өндірісін дамыту арқылы өз мифологиясын насихаттайды. Біз де осы әдісті пайдаланып, өз тарихымызды әлемге танытпақпыз. Сондықтан әлемдік деңгейдегі өте күрделі компьютерлік ойын түрін жасауды қолға алдық. Оны тегін және ақылы негізде де ойнауға болады”, – дейді жоба авторы Әділбек Бисенбаев.

Дереккөз: 24.kz