Қазақты азапқа салмай, отставкаға кетiңiз!

Дүние жүзiнде өз ұлтына жаны ашымайтын, шетте жүр­­­ген қандастарының өз Отанына оралуына қарсы, президентiнiң жүргiзiп отырған ұлттық саясатын аяққа таптағысы келiп тұратын, қазақтар арасында шу шығаруға әуес бiр үкiмет болса, ол – бiздiң Қазақстан Республикасының кезiнде К.Мә­сi­­мов басқарған үкiметi шығар деп ойлаймын!

Неге дейсiз ғой?

Үкiмет шетелден Атажұртқа көшiп келетiн қазақтардың Қазақстанда тұ­рақты тiркеуге тұру-тұр­мауын сол өзi келген ел­дiң Қазақстандағы елшi­лiгi белгiлейтiн етiп, баяғыда қаулы қабылдап тастаған.

Кәрiм Мәсiмов қол қойған сол Қаулы Мәңгiлiк Ел тұжырымдамасы жолға қойылғалы тiптi қатаң атқарыла бастады. Өткен жылдың соңынан бастап, мысалы, Қытай Ха­лық Республикасынан мұнда өз күшiмен көшiп келген қа­зақтар Астанадағы Қытай елшiлiгiнен мынадай орыс тiлiнде жазыл­ған, қызыл мөр ба­сылған “СПРАВ­КА” алған соң барып (куәланды­рыл­ған фото кө­шiр­месi қосымша берiлдi), бiздiң Көшi-қон полициясына тұрақты тiр­кеу­ге тұруға құжаттарын зорға тапсыруда.

Сорымыздың қайнағаны соншалық, Қытай елшiлiгi қазақ тiлiнде жа­зыл­ған құ­жатты, ба­сын кесiп алсаң да, қабылдамайды екен. Тек қа­на, орыс тiлiнде дайындап апаруың шарт!

Нақтылап айтсақ, Қазақстан Республикасы Үкiметiнiң 2009 жылғы 14 желтоқсандағы №2102 Қаулысымен бекiтiл­ген “Ше­телдiктер мен азаматтығы жоқ адамдарды тiркеу жә­не оларға Қазақстан Республикасында тұ­рақты тұру­ға рұқсат беру бойынша мемлекеттiк қыз­мет стандартына” 2012 жылы 28 науырызда өзгертулер мен толықтырулар ен­гiзiп, ҚР Үкiме­тiнiң № 362 Қаулысымен бе­кiткенде, осы Стандарттың 11-бабының      2-тармағына ен­гi­зiлген: “ҚР-да өзге де заңды негiзде уа­қытша болатын адамдар: кел­ген елiн­де соттылығының бар болуын не жоқтығын растайтын құ­жатты; кету парағы не шетелге тұрақты тұру үшiн шығуға рұқсатты растайтын басқа құжат ретiнде болуы мүмкiн шетелдiктiң азаматтығына ие мемлекетiнiң жазбаша келi­сiмiн ұсынады” делiн­ген өз­гертулерде өз қандастарымыздың мүдесi мүлде еске­рiл­меген (http://adi­let.­zan.­kz­/kaz/docs/P090002102_#z0).

Бұған дейiнгi Үкiметтiк қаулылардың көбiнде, мәселе шетелдегi қазақтарға қатысты болған жағдайда, “этникалық қазақ өкiл­дерiнен өзге” немесе “Бұл ұлты қазақ азаматтардан талап етiлмейдi” деген ескертпе сөйлем мiндеттi түр­де қосылып келсе, Кәрiм Мә­сiмов екiншi мәрте қол қой­ған қау­лыда ол сызылып тасталған!

 Мiне, ендi, ҚР-на көшiп келiп, тұрақты тiркеуге тұру­ға өтiнiш берген өз қандастарымыздан да “Келген елiнiң рұқсат қағазы (келу парағы) немесе ҚР-на тұр­ғылықты келуi жайлы рұқ­­сат қағаз” және “Талап қағаз сотталғандығы жайлы және әкiмшiлiк жауап­кер­шiлiкке тартылғандығы жайлы” екi анықтама талап етiлетiн болды. Жоғарыдағы “СПРАВКА”-ны өзi келген елiнен “әкелген” осы “ЕКI АНЫҚТАМА” негiзiнде алады.

Басқа елдi бiлмеймiн, бұл анықтамалар Қытайда мүлде берiлмейдi.

Қысқасы, К.Мәсiмов қау­лысының (28.03.2012, №362) шартына сай, елшiлiктер келi­сiм бермесе, қазақтарды бұ­дан былайғы жерде тұрақты тiркеуге тұрғызып, тарихи Ота­нында қалдыруға Қазақстан Үкiметiнiң қауқары жоқ. Олар келген елiне керi қайтуға мәжбүр...

Қазақ көшiнiң жиырма жыл­дан аса тарихында елге оралған қандастарымыз дәл осындай қолдан қиындатыл­ған кедергiге кездескен емес!

Ал Үкiмет басшысы ауысқалы, Серiк Ахметов премьер-министр болып келгелi қа­шан?! Содан берi бұл мәселе БАҚ-та күн құрғатпай айтылып келедi, айтылып келе­дi... Бiрақ үкiметте үн жоқ, не бiлген ойы барын болжау бiзге қиын. Шамасы, президент аппараты мен мемле­кеттiк хатшылықтың тiзгiнiн қосарлап ұстаған сол экс премьер жаңа Үкiметтi желкесi­нен әлi тұқыртып отырған болса керек!? Сондықтан мынадай мәлiмдеме жасауыма тура келдi:

Құрметтi Серiк Нығметұлы!

Кешке дейiн үлкен кiсiнi айғайлата бермей, бiр уақ ұйқыңыздан оянып, серпiлсе­ңiзшi! Сiз көш бағытын мәң­гiлiкке түзеген Қазақстан деген Тәуелсiз елдiң заңды премьер-ми­нистрiсiз! Сiздi осы елдiң парламентiнiң қос палатасы мақұлдаған соң барып, президент тағайындаған. Сонда бiз Сiзге, Қазақ көшi­нiң тамырына қан жүгiртетiн шығар деп, үлкен үмiт артқамыз. Сырттан көшiп келетiн әр қазақты осы елде тұ­рақты тiркеуге тұрғызу-тұрғызбау – өзге мемле­кет­тiң елшiлiгiнiң еншiсiн­де емес, Қазақ елiнiң өз үкiметiнiң – Сiздiң құзырыңыздағы шаруа! Еркiңiз­дi жат елге неге билетесiз!

Көрдiңiз бе, Қазақ Үкiметi Қазақ көшiн тоқтатып едi, Эдуард Лимонов “Қазақстанның солтүстiк аймағын қарпып қалу керек!” деп айқұлақтанып шыға кел­дi. Сөз жоқ, бұл – Қазақ би­лiгiнiң қауқарсыздығы мен салбөкселiгiнiң кесiрiнен бол­ған iс. Сiз Қазақстанның сол­түстiк аймағын шеттен келген ҚАЗАҚҚА толтырып тастаңызшы, озбыр көршiнiң өңе­шiне құм құйылады.

Сондықтан өзiңiздi шын мәнiндегi мәңгiлiк елдiң премьер-министрiмiн деп есеп­те­сеңiз, өз қолыңызбен тез арада қандастарымызға Қы­тай елшiлiгi беретiн басы ар­тық “СПРАВКА”-ның күшiн бiрден жойып, “Шетел­дiктер мен азаматтығы жоқ адамдарды тiркеу және оларға Қазақстан Республикасында тұрақты тұруға рұқсат беру бойынша мемле­кеттiк қызмет стандартын” ең алдымен қандастарыңыздың тұрақты тiр­кеуге тұруына тиiмдi етiп жаңа Қаулы шығарыңыз! Болмаса, мәңгiлiк елдiң беделiн түсiрмей, қазақты азапқа салмай, толық құрамыңызбен отставкаға кетiңiз!!!