ЖАҢА ТАЛАП СУДЬЯЛАРҒА ДЕГЕН СЕНІМДІ АРТТЫРА АЛА МА?

Қазақстанда қыркүйектен бас­тап судьялардың қызметтік сапасын бағалау қолға алынады. Бұл туралы судьялардың кеңейтілген кеңесінде ҚР Жоғарғы сотының төрағасы Жақып Асанов мәлімдеді. Төраға судьялардың қызметтен кетуі неліктен жиілеу себебін де атап көрсетті. «Судья болам деушілердің саны биыл 2 есе өсті. Бұрын өз еркімен кеткен судьялар оң өз­герістерді көріп, қайта судья боламын деп конкурстарға қатысуда. Тіпті, бала күтіміне бай­ланысты демалысқа шыққан әріптестердің өзі жағдайды көріп, жұмысқа қайта шығуға шешім қабылдап жатыр», – деді ол 2019 жылдың 1 жарты жылдығындағы сот төрелігін жүзеге асыру қо­рытындысы қаралған кеңесте. Сонымен қатар, ол бүгінгі қыз­метте жүрген судьяларға қыр­күйек айынан бастап баға беру қолға алынатындығын айтты. «Біз соған арнайы комиссия құрдық. Ішіміздегі ең абыройлы судьяларды соның құрамына енгіздік. Тамыз айының ішінде жүйемізді, әдістемемізді бекітеміз. Сол әдістеме бойынша әрбір судьяның қызметтік сапасына баға беретін боламыз. Биылдың өзінде 434 судья осы сынақтан өтеді. 2,5 айдың ішінде аудандық соттардың 80 пайызы осы бағалаудан өтуі керек. Жалпы, сотты жаңғыртамыз десек қолға алатын ең басты мәселе – судьялық кадрлар. Осы проб­леманы түбегейлі шешпесек, заң да, мықты сот реформасы да ешқандай нәтиже бермейді, жағдайды түземейді», – деді Жақып Асанов. Айта кетейік, Жақып Асанов осы салаға басшы болып келгелі ел сенімінен айырылған судьяларға жаңа талаптар қоюмен келеді. Бірақ осы күнге дейін одан нақты нәтиже болған емес. Бұл жолғы ұсынысы ұтымды бола қоярына да сенім аз. qazaquni.kz