2018 ж. 05 ақпан
8132
17
Зейнетсіз еңбек! Бүгін бір топ оралман Алматыдағы Қытай консулдығына арыздарын өткізуге жиналды. Кезінде шекара асып келген қандастырымыз, Қытайдан алып келген қомақты зейнетақыдан қағылғандарына наразы. Қытай заңы бойынша зейнетке сол елде шығып, кейін басқа жаққа қоныс аударса да зейнетақы төленуі тиіс дейді олар. Бірақ көрші елдің билігі өз міндеттерін орындамай отырған көрінеді, деп хабарлайды КТК арнасы.
Шау тартқан шақта ай сайынғы ақыларынан қағылғандар бүгін Қытай консулдығының алдына жиналды. Арыздарын қолтықтаған ағайын Қытайдың өздері шығарған заңды өздері сақтамай отырғандарына наразы. Ғұмырларының 60 жылдан астамын Қытайда сүріп, сол жақта еңбек етіп, кейін Қазақстанға оралып азаматтық алған қандастарымыз төгілген тер еш кетті деп опынады.
“Қытай республикасының ата заңында анықтап тұрып айтылған бұл әңгіме. Ол жақтағы біздің қамсыздандыруымыз да, зейнетақымыз да тоқталмайды. Егер тоқтатып жатқан жағдайда, жергілікті орган оған тартылады деген жері тағы бар. Мәселен 20 бапта мұғажырлар заңында берілу керек тоқтамайды деп жазылса, 26 бапта осыны атқармаған жағдайда бұны сол заңдастырмаған адам жауапқа тартылады деп жазылған”, – дейді Алматы қаласының тұрғыны Фатима Әскербай.
Яғни, Қытай заңында сол жақта зейнетке шығып, кейін өзге елдің азаматтығын алғандарға алалау болмайтыны, зейнетақы тоқтатылмайтыны тайға таңба басқандай жазылған екен. Бірақ, Шыңжан өлкесі ол ережені пысқырмайтындай. Түскен арыз, шағымдарға жөнді жауап бермей, үнсіз жатқан көрінеді. Жалғыз ағаштың орман болмайтынын түсінген зейнеткерлер бүгін тайлы-тұяғы қалмай Алматыдағы Қытай консулдығының алдына жиналды. Осыған дейін жекелей келіп, шағымданнып көрген. Бірақ, мардымды жауап алмай, таулары шағылып қайтқан екен.
“Қытайда 56 ұлт бар. Бірақ олар тең қарамай отыр. Қудалау 2016- дан басталды. Одан бұрын жақсы болатын”, – дейді Алматы қаласының тұрғыны Жұмағали Мизамбек.
Қытай консулдығы зейнеткерлерді ішке кіргізуге құлық танытпады. Арыздарын алсын деп «шабармандарын» жіберіпті. Бұл шағым бойынша да нақты жауаптың қашан болатыны белгісіз.
Арыз-өтініштерін өткізгендерге енді әліптің артын бағуға тура келеді. Егер де Қытай консулдығынан қайыр болмаса, онда халықаралық ұйымдардың көмегіне жүгінеміз деп отыр. Олардың бар талабы, заң бойынша қартайған шақтарында еңбектерінің зейнетін көру.
