Оңтүстікте бір ауыл халқы жаппай ауруға шалдығып жатыр

Оңтүстік Қазақстан облысының бес мыңнан астам тұрғыны бар Дарбаза ауылында қара халық жаппай ауруға шалдығып жатыр. Балаларының басы айналып, мұрындарынан қан кетсе, тексеруден өткен қырық әйелдің омырауынан қатерлі ісіктің белгісі анықталған. Күндіз де түнде де далаға шығудан қалдық деп ашынған қара халық осының барлығына себеп, ауыл іргесіндегі шайыр өндіретін зауыттан шығатын зиянды түтін деп отыр.

Сарыағаштың Дарбаза ауылы тұрғындары түнгі бірден таң атқанғанға дейін сыртқа шыққан кез-келген бала еріксіз жылайтынын, ал күндіз тынысы тарылғаннан мұрны қанап, басы айналуы жиіледі деп отыр. Аяғы ауыр келіндердің түсік тастауы белең алған. Алты жасар баласының ауруға шалдыққанын айтқан дарбазалық Шолпан Үкібаева, басы айналып құлап қала берген екі баласын ауылдан алыстатыпты. Сырттан келген қонақтар болса, жағымсыз иістен әп-сәтте мазасы қашатын көрінеді.

ШОЛПАН ҮКІБАЕВА, тұрғын:

– Ал өзімнің алты жасар балам кәдімгідей, мама смола басым ауырады деп мұрны қанайды. Аяп кетесің. Менің қазір екі балам, сенбесеңіз апарамын, өзімнің шешімнің үйінде жүр. Төрт айдан бері шешімнің үйінде жүр.

БАЯН ҚҰЛБОЛДИЕВА, тұрғын:

– Менің келінім міне, екі егіз баласын түсіріп алды. Осы смола деп.

НАҒИМА ЖАРМЕНТАЕВА, тұрғын:

– Бір жақтан біреу қыдырып келсе, кәдімгідей лоқсып құсады. Соны иіскеген кезде.

Ең сорақысы, алпыс үш әйелді тексеруге алған дәрігерлер қырық әйелдің омырауынан қатерлі ісіктің белгісін анықтапты. Бұл жағдай сақтала берсе, ауыл халқы түгел қырылып кетпек, - дейді тұрғындар.

ЖАНИЯ АБДУЛЛАЕВА, тұрғын:

– Біз шаршадық. Шаршағаннан бұрын балаларымыз қан құсып жатыр. Шаш түсіп жатыр. Тырнақ түсіп жатыр. Біз қайда барамыз, соны айтыңдаршы. Сонда алпыс үш адамнан қырық адам рак. Кеше айтты ғой медсестра.

Халықтың шағымы зауыт ашылғалы туындап отыр дегенді биліктің өзі де растады. Наразылық жиілеген соң, құзырлы мекемедегілер бас қосып, жиын да өткізіпті. Оған зауыт өкілдері де қатысыпты. Ал дәрігерлердің науқастар санының күрт өскендігі жайлы ақпаратты әкімдік растады.

ҚҰДІРЕТ ҚЫСТАУБАЕВ, Сарыағаш ауданы әкімінің орынбасары:

– Қазіргі таңда аудандық прокуратура тарапынан іс қозғалды. Облыстық экологиялық комитетінен тиісті қаулы шығарылды. Соның тиісті мамандары лабораториясымен келіп, бұл зауыт жөнінде нақты жұмыстар жүргізіп, өзінің шешімін беретін болады.

Билік халыққа зауыт басшысы Серік Ағабековтың уәдесін алдық, бүгіннен бастап зауыт өз жұмысын толықтай тоқтатты деп мәлімдеді. Алайда тұрғындар пікірі басқа. Олар халықты улап отырған қою қара түтіннің аздап саябырсығаны болмаса, тоқтады дегені өтірік деп отыр. Егер улану дерегі осылай жалғаса берсе, халық темір жолды жабамыз дейді.