Қазақстанда жаңа министрлік құрылды

Қазақстан президенті Нұрсұлтан Назарбаев Қорғаныс және аэроғарыш өнеркәсібі министрлігін құру туралы жарлыққа қол қойды. Бұл туралы Ақорданың баспасөз қызметісхабарлады.

Қазақстан Конституциясының 44-бабының 3) тармақшасына сәйкес мемлекеттік басқару жүйесін жаңғырту және оның тиімділігін арттыру мақсатында ҚАУЛЫ ЕТЕМІН:

1. Қазақстанның Қорғаныс және аэроғарыш өнеркәсібі министрлігі (бұдан әрі – Министрлік) құрылсын.

Қорғаныс, аэроғарыш өнеркәсібі және электрондық өнеркәсіп, ақпараттандыру және байланыс саласындағы ақпараттық қауіпсіздік (киберқауіпсіздік), жұмылдыру даярлығы және жұмылдыру саласындағы мемлекеттік саясатты іске асыру, мемлекеттік материалдық резервті қалыптастыру және дамыту, бірыңғай әскери-техникалық саясатты және әскери-техникалық ынтымақтастықты жүргізуге қатысу, қорғаныстық тапсырысты қалыптастыру, орналастыру және орындау саласындағы басшылық Министрлік қызметінің негізгі бағыттары болып айқындалсын.

Жаңадан құрылған Министрлікке:

Қазақстанның Қорғаныс министрлігінен – қорғаныс өнеркәсібі саласындағы;

Қазақстанның Инвестициялар және даму министрлігінен – ғарыш қызметі саласындағы;

Қазақстанның Ұлттық экономика министрлігінен – жұмылдыру даярлығы және жұмылдыру, мемлекеттік материалдық резервті қалыптастыру және дамыту саласындағы;

Қазақстан премьер-министрінің Кеңсесінен – ақпараттық қауіпсіздікті қамтамасыз ету және Қазақстанның Ақпарат және коммуникациялар министрлігінен ақпараттандыру және байланыс саласындағы ақпараттық қауіпсіздікті қамтамасыз ету саласындағы функциялар мен өкілеттіктер берілсін.

2. Қазақстанның үкіметі:

1) Қазақстанның Қорғаныс және аэроғарыш өнеркәсібі министрлігінің Ақпараттық қауіпсіздік комитетін, Аэроғарыш комитетін және Мемлекеттік материалдық резервтер комитетін құруды;

2) осы жарлықтан туындайтын өзге де шаралар қабылдауды қамтамасыз етсін.

3. «Қазақстан үкіметінің құрылымы туралы» Қазақстан президентінің 1999 жылғы 22 қаңтардағы № 6 жарлығына мынадай толықтыру енгізілсін:

1-тармақта:

«Қазақстанның Қорғаныс министрлігі;» деген жолдан кейін мынадай мазмұндағы жолмен толықтырылсын:

«Қазақстанның Қорғаныс және аэроғарыш өнеркәсібі министрлігі;».

4. Осы жарлықтың орындалуын бақылау Қазақстан президентінің әкімшілігіне жүктелсін.

5. Осы жарлық қол қойылған күнінен бастап қолданысқа енгізіледі.