ҚАЗАҚША СӨЙЛЕЙ АЛМАЙТЫН БИЛІК ҚАЗАҚТЫ ҚОРҒАЙ АЛА МА?!.

Сыртқы істер министрлігі  қазақтың сөзін қашан сөйлейді?!.

Баспасөзде хабарланғандай, шекараны бұзбаса да, қазақ азаматы Уәлихан Ахметов (төменгі суретте) өзбек шекарашыларының оғынан мерт болды... Балық аулап жүрген қазақты өзбек шекарашылары "аулап", автоматтан оқ боратып, атып тастады...  Артында аңырап 7 баласы, қарт анасы қалды... Осы қазақ-өзбек шекарасына жақын жүрген өзбекті қазақ шекарашылары неге атпайды? Неге үнемі қазақты өзбек атады? Неге? Неге? Неге??? 1.Қазақ шекарашыларының мылтығы атылмай ма, жоқ шекарашылар мылтық ата алмай ма?

2. Біздің азаматтардың өзбек шекарашылары үшін қалаған кезінде ата салатындай мал ғұрлы құны жоқ па?
3. Бұл туралы біздің мемлекеттің, қазақша қақпайтын Қазақтың Сыртқы істер министрлігінің қатқыл қарымтасы бола ма, болмай ма?
4. Азаматтарымыз жазықсыз өліп жатқанда үн шығармай, үйдің ішіндегі күңкілмен қалу - Сыртқы істер қатынасының қандай "дипломатиялық" түріне жатады?
5. "Ұрысы мықты болса, иесі жазықты " дейді қазақ мақалы. Бұл ұрысы жуан болса, малы ұрланған бейшара кедейдің жазықты болатыны ("малы неге ұрының көзіне түседі?") сияқты, "қазақ азаматтары неге шекараға жақындайды" деп, жуандық, дүмді күштілік көрсететіндей біз өзбектен әлсіз, бейшара, қару-қауқарсыз  елміз бе?

"Қазақ шекарашылары мылтық ата ала ма?!."-деген риторикалық сұрақ тек қазір ғаламторда ғана айтылып отырған жоқ. Бұл сұрақ осыдан оншақты  жылдай  бұрын да,  парламентте де қозғалған.  Сол кездегі Мәжіліс төрағасы  Жармахан Тұяқбайдың аузымен де айтылған...  Жазушы Дулат Исабековтың :  "Баяғыда біздің ауылдың бір шалы: "Неге осы той сайын   төбелес болса, тек біздің ауылдың жігіттері таяқ жейді"-деп боқтап отыратын еді, біздің шекарашылардың тірлігі тура сондай болды ғой"-деп  күйінетіні де сол кезде еді. Сонда да  осындай әдеттегідей өзбек шекарашысы атып өлтірген  кезекті қазақ азаматының қазасы  үстінде айтылған ашулы сөздер болатын. Әлі сол  баяғы  дәрменсіз, іләкәр халімізден оңала қойған жоқпыз? Шекарашыларымыз  Ұлтттық Қауіпсіздік Комитетіне қарағандағы қауіпсіздігіміз осы ма?!. Біз қашан азаматтарын қорғап,  сөзін сөйлей алатын ел боламыз?!.  Бұған жауап беретін Сыртқы істер министрлігі, министр Ерлан Ыдырысов  шетелдің - Ресейдің мемлекеттік тілінде сөйлесе, қазақтың сөзін қалай  және қашан сөйлейді?!.  Мемлекеттің тілін білмеген министр қанша маман болса да, тірлігін оңдыра ма? Қазақша сөйлей алмайтын билік қазақты қорғай ала ма?

Қазыбек ИСА,

qazaquni.kz