Асанәлі Әшімов: Бұл құрмет Елбасыға ғана емес, елімізге көрсетілген құрмет!

 Қазақстанның Еңбек Ері, Қазақстан және КСРО Халық әртісі,  Асанәлі Әшімовтың  айтуынша, бұл құрмет Елбасыға ғана емес, елімізге көрсетілген құрмет.

- Алматыдағы ең ірі көшелердің бірі – Фурмановқа Елбасы аты беріліпті. Бәре­келді! Бұл жаңалыққа риясыз қуан­дым. Бұл ұсынысты қала тұрғын­дарының көптен бері айтып жүргенді­гінен де хабардар болатынмын.

Алматы қаласында екі мыңға жуық көше бар дегенді естігенім бар еді. Кө­бісі бұрын кеңестік саясатқа байла­нысты түрліше аталды. Тәуелсіздік алғаннан кейін жоғымызды түгендеп, жыртығымызды жамай бастаған тұста көше атауларын қазақшаландыру ісіне де «бәрекелді» дескен қазақтың бірімін. Ал Фурманов деген – орыс жазушысы, революционер, Чапаевтың 25-атқыштар дивизиясының комиссары болған адам. Сондықтан ол біз үшін ешкім емес.

Кезінде астана мәртебесі Алматыдан Елордаға көшкенімен, мәдениеттің киелі ордасы болып саналатын алып шаһардың осы күнге дейін шыққан биігі бір аласар­ған емес. Оны бәріміз көріп-біліп, бағам­дап жүрміз. Керісінше, Алма­ты күннен-күнге қанатын кеңге жайып, дамып, алып іскерлік орталы­ғына айналып келеді. Соның нәтиже­сінде бүгінде Алматы ең ірі Орталық Азиялық мегаполис сапында тұр. Мұ­ның бәрі, сөз жоқ, Елбасы Нұрсұлтан Назарбаевтың сарабдал саясатының арқасы. Кешегі аяғын тәй-тәй басқан жас Қазақстанды аз уақыттың ішінде бүкіл жаһанға танытқан Нұрекең туралы бүгін қалай айтсақ та жарасады, барлық қалыпқа сыйып тұр. Ұлт Көшбасшысын кешегі елім деп өткен Алаш арыстарының арманын жүзеге асырған жаңа келбеттегі қазақ елінің негізін қалаған тұлға десек те қателес­пейміз.  Меніңше, бұл құрмет Елбасыға ғана емес, елімізге көрсетілген құрмет.