ЕЛБАСЫ ӘЛЕМДІК БІРЫҢҒАЙ ВАЛЮТА ӘЗІРЛЕУДІ ҰСЫНДЫ

Астанада өткен онынышы экономикалық форумының жалпы отырысында сөз сөйлеген ҚР Президенті Нұрсұлтан Назарбаев халықаралық есептік төлем бірлігін енгізу мәселесін қарайтын уақыт жеткенін айтты. Әлемдік ортақ валюта енгізу мәселесін Елбасы бұрын да көтерген болатын. «Әлемдік қаржы архитектурасын трасформациялау қа­жеттілігі жетілдіріліп отыр. Халықаралық есептік төлем бір­лігін енгізу мәселесін байыппен қарайтын уақыт жетті. Ол әлемді валюталық соғыстардан, алаяқтықтан арылуға, сауда қарым-қатынастарында қателіктерден сақтануға, нарық­тағы құбылмалықты төмен­де­туге мүмкіндік береді», – деді Қазақстан Президенті. Елбасының айтуынша, валюта қарапайым, ол пайдаланушыға бағынышты болуы тиіс. «Блокчейн сынды технологиялардың дамуын, цифр­ландырылуды ескере отырып, криптовалюта түріндегі есептік бірлікті құруға да болар еді», – деді Елбасы. ҚР Президентінің пайымынша, ол абстрактілі сенімді тірек етпеуі тиіс. Керісінше, нақты активтерді қамтамасыз етуі қажет. Бұл валюта бүкіл әлемдегі қолданушылар тарапынан қабылдануы керек. «Сондықтан, бұл іске тек қана G20 емес одан да көп мемлекеттер қатысуы үшін біз G-Global-ды ұсындық», – деп атап өтті Мемлекет басшысы. Нұрсұлтан Назарбаевтың айтуынша, жаһандық валютаны Орталық банктердің пулын құру жолымен, мәселен, БҰҰ жанына арнайы комитет құру арқылы енгізуге болады. «Барлық елдің теңқұқылы, әділ өкілдігі болуы тиіс. Әрине, мәселе қарапайым емес. Бірақ, бұл проблема жоғалмайды. Бізге оны айтып қана қоймай, шешу де қажет», – деп түйді сөзін ҚР Президенті. Елбасының осы бір құнды ұсынысын бірқатар мемлекеттер іштей қолдайтыны белгілі. Бірақ АҚШ сияқты алпауыт тек қана өз валютасының ғана әлемдік айналыста болғанын қалайтыны түсінікті. Сол арқылы қыруар қаржы тауып отыр. Сондықтан бұл ұсынысты жер жүзі мемлекеттерінің бәрі бірауыздан қызу қолдау аса қажет. qazaquni.kz