Қазақстандық ауыр атлеттердің қанын тексерген зертхана жалған ақпарат беріпті

Рио-де-Жанейродағы антидопингтік зертхана тестінің нәтижелерін қате көрсеткен. Осыған орай, оның жұмысы 6 айға дейін тоқтатылды делінеді. Алайда аталған зертхана өз жұмысын алдағы шілде айында жандандыруға үмітті.

Бұл туралы Рейтер агенттігіне сілтеме жасап, Р-спорт хабарлайды.

Дисквалификация маусымның 22-сі күні заңды күшіне еніп, зертхана лайықты ескерту алған. Бұл шешіммен келіспесе, олар 21 күн ішінде үкімнің үстінен шағым түсіре алады.

Рейтер агенттігі Рио-де-Жанейродағы антидопингтік зертхана тесттердің нәтижесін өтірік көрсеткен деген фактіні нақтылайды.

Енді қан мен зәрдің барлығы Бразилиядан Швейцарияға жөнелтіледі. Дәл осындай жағдай 2014 жылы футболдан Бразилия чемпионатында болған-ды.

Рио-де Жанейродағы Олимпиада ойындары 5-21 тамыз аралығында өтпек.

Демек, Рио Олимпиадасынан шететтілген ауыр атлеттеріміздің жолы ашылуы мүмкін. Әзірге, бұған қатысты ресми мәлімдеме жасалған жоқ.