"Ақ жол" партиясының ұсынысымен Санкт-Петерборда Әлиханға ескерткіш тақта қойылады

    Алаш көсемі Әлихан Бөкейханға ол оқыған Ресейдегі Санкт-Петербор мемлекеттік орман-техникалық университетіне ескерткіш тақта орнатылатын болды. Бұл ұсынысты, яғни ескерткіш тақта орнатуды «Ақ жол» Демократиялық партиясының төрағасы, Мәжіліс депутаты  Азат Перуашев бастаған парламенттік фракция ұсынып, Санкт-Петербор мемлекеттік Орман-техникалық университетінің ректорына арнайы хат жолдады. Оған қоса «Ақ жол» Ресей Мемлекеттік  Думасын да іске жұмылдырды, атап айтқанда – «Справедливая Россия» партиясының Мемлекеттік Думадағы С. Миронов бастаған фракциясы қызу қолдау көрсетті. Нәтижесінде осындай сәтті де, қуанышты шешім қабылданды.

Одан бөлек «Ақ жол» партиясы ұлт көсемінің қиян-кескі күреске толы ғұмырының ақырғы 15 жылын (1922-1937 жж.) өткізген Мәскеудегі Б. Кисловский орамы, 4 үйі мен Самара қаласындағы 1909-1917 жылдары тұрған Казанская көшесі, 30 (қазір 32 үй) үйіне де естелік тақта орнату ісі қолға алып отыр. Бұл игілікті іске байланысты «Ақ жол» партиясының төрағасы, Мәжіліс депутаты Азат Перуашев Қазақстанның Ресейдегі Елшісі Иманғали Тасмағамбетовке  арнайы  хат жолдады.

 "Ақ жол" партиясының осындай жүйелі ұсыныстары мен нақты істерінің  арқасында бүгін таңертең  Санкт-Петербордан қуанышты хабар  келіп жетті. Алаш көсемі Әлихан Бөкейханның 1890-1894 жылдары оқып бітірген бұрынғы Императорлық Орман институты, қазіргі Санкт-Петербор мемлекеттік орман-техникалық университетінің Ғылыми кеңесі бас ғимаратының маңдайшасына өзінің даңқты түлегі, 2015 жылы ЮНЕСКО Бас конференциясынының 38-сессиясы «Бүкіл әлемдік шынайы даңқты қайраткер» деп жариялаған  Әлихан Бөкейхан туралы естелік тақта орнату туралы "Ақ жол" партиясының ұсынысын басым дауыспен қолдап  (27 дауыс қолдады, 7 дауыс қарсы, 5 дауыс қалыс қалды), игілікті шешім қабылдады.

Алаш көсемі Әлихан Бөкейхан есімі әрқашанда ардақтауға лайықты. "Ақ жол" партиясы Алаш идеясын насихаттауды жүйелі түрде, нақты істермен жалғастыра береді. Қазақ үні