Азат ПЕРУАШЕВ: ҚАРЖЫ МИНИСТРЛІГІ ҚОЙЫЛЫМ ҚОЮДЫ ДОҒАРУЫ ҚАЖЕТ
2012 ж. 14 қараша
1428
1
Салық кодексіне түзетулер енгізу туралы заң жобасын дайындау мен жүргізуді Экономика министрлігіне беру қажет – бұл туралы «Ақ жол» фракциясының жетекшісі Мәжілістің пленарлық отырысында бірінші оқылымдағы «Қазақстан Республикасының салық салу мәселелері бойынша бірқатар заңнамалық актілеріне өзгерістер мен толықтырулар енгізу туралы» заң жобасын талқылау барысында мәлімдеді.
«Біздің алдымызда бір қойылым ойнатылып жатқандай әсер туындайды: Салық кодексіне түзетулер енгізу туралы заң жобасын экономика және сауда министрі таныстыруда, ал оның нақты дайындаушысы Қаржы министрлігі болып табылады. Сонымен бірге, бұл принципиалды мәселе. Біз салық заңнамасын дайындаумен фискалдық ведомство емес, теңдестірілген экономикалық дамуға жауапты органның айналысуы тиіс екендігіне сенімдіміз», – деп атап өтті депутат.
Оның пікірі бойынша, бұған Қаржы министрлігінің бірыңғай ақша жинауға деген ведомстволық қызығушылығы себепші, ал кәсіпорындардың аман қалуы мен олардың бәсекеге қабілеттілігінің мәселелері екінші қатарда қалып отыр.
Азат Перуашев Мемлекет басшысының қазіргі парламенттік сессияның ашылу кезінде Үкіметке ДСҰ-ға мүше мемлекеттердің тәжірибесі негізінде өзіміздің өндірістік кәсіпорындарымызды қолдау бойынша шараларды әзірлеу туралы тапсырмасын еске салып өтті. Себебі, ДСҰ аясындағы түрлі кедергілерге қарамастан, әрбір мемлекет іс жүзінде өзінің тауар өндірушілеріне қатысты протекционистік саясат жүргізеді.
«Бұл жерде ең тиімді деген шаралардың бірі ҚҚС-тың салалық мөлшерлемесін қолдану болып табылады. Белгілісі, салалық мөлшерлемелерді Финляндия, Ұлыбритания, Польша, Испания, Канада, Латвия және т.б. елдерде қолданады. Сонымен қатар, ДСҰ-ға кіру алдында заң жобаларымен жұмыс жасау кезінде, бізге отандық бизнестің мүддесі туралы ұмытпау қажет. Себебі ДСҰ-ның салықтық жеңілдіктерге тыйым салатындығы белгілі, алайда салық салудың салалық мөлшерлемелеріне рұқсат етіледі», – деді депутат.
Бұл елдердегі ҚҚС-тың жалпы мөлшерлемесі 24-28 % жағдайында, салалық мөлшерлемелер 0-ден 5 %-ға дейінгі аралықты құрайды. Олар приоритетті салаларға қолданылады: ауыл шаруашылығы, машина жасау, жеңіл және тамақ өнеркәсібі, туризм саласы және т.б.
Азат Перуашев біздің мемлекеттік органдардың аталған механизмді қасарысқан түрде байқамайтындығына қатысты түсінбестігін білдірді. Қаржы министрлігімен дайындалып, ұсынылған түзетулер ішінде де олар болмай отыр.
– Сіз отандық бизнесті қолдаудың бұл түрі туралы білесіз бе және әсіресе алдағы ДСҰ-ға кіруімізді ескере отырып, оны қолдануды жоспарлап отырсыздар ма? – деп Азат Перуашев экономика министріне сауалын қойды.
Хабарланып отырғандай, «Ақ жол» партиясының фракциясы екінші оқылымға дайындық кезінде талқыланып отырған салық салу бойынша заң жобасына тиісті ұсыныстарды кез-келген жағдайда енгізуге ниетті.
Қазақстанның «Ақ жол» Демократиялық партиясының баспасөз қызметі