Өскеменде Жәнібек Кәрменовті еске алу кеші өтті

ҚазКСР-нің еңбек сіңірген артисі, ұлттық өнердің дамуына ерен үлес қосқан дарын иесі Жәнібек Кәрменовтың 70 жылдығына орай Шығыс Қазақстан облыстық кітапханасында «Үнің кетпес құлақтан...» атты әдеби-сазды кеші өтті, - деп хабарлайды "Қазақ үні" ақпарат агенттігі.

Әдеби-сазды кеш барысында қатысушыларға әншінің сүт кенжесі журналист Шаһ-Керім Жәнібекұлының әкесі туралы сыр шерткен бейнежазбасы мен «Жәнібек Кәрменов», «Жәнібек ән салады» кітаптарының авторы, журналист Дәулет Сейсенұлының естелігінен бейнесюжет ұсынылды.

Сонымен қатар облысымызға белгілі дәстүрлі әншілер Әділ Тұрғанбаев, Қуаныш Оралбекұлы, ағайынды Абдуллиндер атындағы өнер колледжінің студенті Елдос Мұңғылбек халық есінде бірегей дауысымен мәңгіге сақталған өнер майталманының орындауындағы әндерді орындап, ел есіндегі әнші туралы естеліктерді бір жаңғыртты.

- Әнші 1949 жылы қазіргі Шығыс Қазақстан, Абай ауданы, Қарауыл ауылында дүниеге келген. Алғашында Алматы эстрада-цирк өнері студиясының әншілік бөлімін, кейін Қазақ мемлекеттік университетін тәмамдаған. «Өнер» баспасында редактор, Алматы мемлекеттік консерваториясында «Халық әндері» кафедрасының меңгерушісі болып қызмет атқарды. Өнер тақырыбына арналған «Ақылбайдың әні», «Ғашықтың тілі», «Махаббат әні» атты кітаптары жарық көрді. 1984 жылы әншіге Қазақстан Ленин комсомолы сыйлығы берілді. Тағдырлы талант 1992 ж. небары 43 жасында көлік апатынан қаза болды. 1996 жылы Қарауыл ауылындағы музыка мектебіне әншінің есімі берілді, - де жазушының өмірбаянын еске салды шара аясында библиограф Уалханова Ракия.