1 желтоқсан Қазақстанның барлық аймақтарында, қалалар мен аудандарда Тұңғыш Президент күні мерекесін атап өтеді.
Бұл мейрам ерекше, себебі Тәуелсіз Қазақстанның қалыптасуы мен құрылысына Нұрсұлтан Назарбаевтың үлкен үлес қосқанын айқын көрсетеді және Қазақстанның даму жолын түсіну үшін тағы бір мүмкіндік береді.
Бүгін Алатау ауданында "Рухани жаңғыру" бағдарламасы аясында осы айтулы мереке аталып өтті. Алатау ауданы әкімінің аппараты, аудандық ақсақалдар кеңесінің мүшелері, денсаулық сақтау, білім беру саласы қызметкерлерінің басын біріктерген бұл мерекеде Алатау ауданы әкімінің орынбасары Ағыбаев Саят Болатұлы алғашқы сөз алып, аудан тұрғындарын құттықтады.
«Қазіргі таңда кең байтақ елімізде Елбасының "Рухани жаңғыру" атты бастамасымен атқарылып жатқан игі істер тәуелсіз Қазақстанды бұдан да биік шыңдарға көтереріне біздің ешқандай күмәніміз жоқ.Мұның барлығы да бүгінгі тәуелсіздігімізді тұғырлы ету жолындағы Тұңғыш Президентіміз - Елбасының еселі еңбегінің жемісі!» - деп құттықтау сөзін қортындылады. Алатау аудандық ақсақалдар кеңесінің төрағасы –Құдайберген Қабдолдин мерекеге орай «Қазақстан Республикасының патриоты» төсбелгісімен марапатталды.
Одан әрі мерекелік концерт әдемі әнмен өріліп, тамаша бимен көркемделді. Қазақ этрадасының жарық жұлдыздары Бахыт Шадаева, Индира Елемес, Мусаиф Тұңғышбек, Муслимов Дамир, «J and S» тобы президентіміздің құрметіне ән шырқады.
