ЕЛ СЕРКЕСІ БОЛАТЫН ЖАСТАР ҚАТАРЫ АЗ ЕМЕС

Ө.Жолдасбеков атын­дағы Студенттер сарайын­да шаһар басшысы Бауыр­жан Байбектің қатысуымен "Рухани жаңғыру" бағдарламасы аясында «Алматы – жастар қаласы» атты жастар форумы өтті. Алқалы басқосуда үстіміз­дегі жылы қабылданған «Алматы қаласының жас­та­рын қолдау жол картасы–2020» жоспарлы бағдар­ламасын жүзеге асыру бағытындағы жұмыстар қорытындыланды.

– Биылғы жылды қала шеңберінде «Жастар жылы» деп жарияладық. Мегапо­листің белсенді жастары «Алматы қаласы­ның жастарын қолдау жол картасы – 2020» жоспарлы бағдарламасын дайындап, тұсауын кесті. Сондай-ақ, Елбасымыз өзінің әрбір Жолдауында жастарға жауап­кер­шілік артады. Елдің ертеңі жастар деп қарайды. Президентіміздің айтқандай, мемлекеттік жастар саясатының негізгі мақсаты – лайықты тұлға ретінде болашақ патриотты тәрбиелеу болып табылады. Жастар – Қазақстанның болашағы, ел дамуының қозғаушы күші. Мемлекет бас­шы­сының саясатының басты мақсаты да жас­тарға қамқорлық көрсету. Бұл ретте біз­дің міндетіміз – жастардың өз мүдделері мен әлеуеттерін жүзеге асыруларына жағ­дай жасау, – деді қала әкімі Бауыржан Байбек.

Бүгінде арамызда ел серкесі болатын жастар қатары аз емес. Ал бүгінгі күн талантты, жігерлі, өзіне сенетін адамдардың, арманға бай және олардың жүзеге асыруға ерік-жігері жететін адамдардың уақыты. Оның үстіне мемлекет жастар үшін барлық жағдайды жасап отыр. Бұдан артық қандай бақыт бар.

Алматыда бос уақытын тиімді өткізгісі келетін жастар үшін есігін айқара ашатын орындар жетіп жатыр. Мәдени, рухани демалысты, тіпті бос уақытында спортты жанына серік етемін деген алматылық жас­тар үшін қалада барлық жағдай жасалған. Алайда, барлық жастар құрылымдарын тиімді үйлестіретін бір ортақ кеңістік, ортақ алаң жоқ болатын. Бұл олқылықтың орнын толтыру мақсатында  «Алматы қаласының жастарын қолдау жол картасы–2020» аясында Алматыдағы бұрынғы трамвай депосының орнына жастардың Лофт-орталығы ашылды.

– Лофт-орталық – жастардың басын біріктіріп, оларды ортақ идеяға ұйытып, ел, тіл, діл мүддесін бір арнаға тоғыстырған алаң болды. Мұнда жатақханаларды қада­ғалау орталығы, қалалық мансап орталығы, пікірталас клубтары, демалыс орталықтары, сырттан келген жастармен жұмыс істей­тін және студенттік клубтар мен ұйымдар, волонтерлық корпустар бар, – деді Б.Байбек.

Сонымен қатар, биыл «Алматы жаста­ры» деп аталатын бағдарламамен жастарға баспананы жеңілдетілген жолмен жалға беру шарасы қолға алынды.

Дәлірек айтқанда, «Тұрғынүйқұры­лысжинақ» банкі арқылы несиелеудің пилоттық жобасы іске қосылды. Жастар­дың жас деңгейі 35-ке дейін ұзартылып, бағдарламаның жүзеге асуы үшін жергілікті бюджеттен 1 млрд. теңге бөлінді. «Алматы жастары» бағдарламасы арқылы жылдық 5 пайыздық мөлшерлемемен жыл аяғына дейін 100 жас отбасы баспаналы болмақ.

Жастардың тұрғын үй мәселесін шешу үшін биыл студенттер мен жас отбасыларға жатақ­ханалар салу жобасы іске асуда. «Жол картасы» аясында 2020 жылға дейін Алматы студенттеріне 12 жатақхана  салу жоспарланған. Жоспарланған 12 жатақха­на­ның төртеуінің  құрылысы биыл аяқта­лады.

Жастардың жұмыспен қамтылуына да барынша көңіл бөлініп отыр. Ол үшін  жергілікті бюджеттен 500 млн. теңге бөлінді. Сонымен қатар, «Жастарды қысқа мерзімді кәсіби оқыту» жобасы іске асуда. Мұнда мамандықтың ерекшелігіне байланысты оқыту мерзімі 1 айдан 3 айға дейін созы­лады.  Бұдан өзге, «жастар тәжірибесі» енгі­зілді. Ағымдағы жылда жастар тәжірибесі бойынша 700-ден 2 мың жасқа дейін квота­ны көбейту жоспарлануда. Сондай-ақ, тәжірибе  шеңберінде жалақының 38 000-нан 56 000 теңгеге дейін көтерілуі көзделуде.

Жастар форумы аясында «Жастар жалы­ны» сыйлығының жүлдегерлерін марапаттау рәсімі өтті. Бұл ретте «Еріктілер лигасы» ҚҚ-ның төрағасы Әзиз Қажден­бек «Жыл волонтері», «RUMІ GROUP» басқарушы серіктесі Қуаныш Шоңбай «Жас кәсіпкер» номинациялары бойынша жеңімпаз атанды. Ал жыл спортшысы Жан­сая Әбдімәлік «Спорт саңлағы» сый­лығын иеленді. Халықаралық бизнес универ­ситетінің әлеуметтік даму бойынша проректоры Қайыржан Меңдіғалиев үздік «Жас тәлімгер» атанса, Бостандық ауданы ХҚКО-ның құжаттар қабылдау бойынша маманы Ирина Кухарская «Ел қызметшісі» марапатына ие болды. «Мейірімді жүрек» номинациясын «Қайырымды жандар» еріктілер тобын құрушы Айдын Тоқсан­баевқа бұйырды. Жыл белсендісі ретінде «Белсенді жас» сыйлығын «G38» клубының жетекшісі Айсұлу Ерниязова алды. «Шабыт» номинациясы бойынша дизайнер, суретші Кристина Депутатова жеңімпаз атанды. Аян Қалмұрат «Белсенді блогер» атауына ие болса, «Жас Отбасы» сыйлығы «Жастар үні» бірлестігінің басшысы Дәурен Бабамұратовқа берілді.

Мәншүк БЕКБОСЫН

Алматы ақшамы