Алматының мешітке келуші жамағаты бір миллион теңге ұтып алды

Алматыда «Рухани жаңғыру» бағдарламасын қолдау мақсатында футболдан мешітке келуші жамағаттар арасында финалдық кезеңі өтті.

«Бағанашыл» спорт кешенінде Алматы қаласының барлық ауданның үздік мешіттерінің спортшылары бас қосты. Олар: Ұлжан (Алатау ауданы), Ақсай (Әуезов ауданы), Төле би (Алмалы ауданы), Бәйкен (Бостандық ауданы), Әмин (Жетісу ауданы), Альмерек (Түрксіб ауданы), Әл-Хамид (Медеу ауданы), Қалқаман (Наурызбай ауданы) мешіттерінің өкілдері.

Үшінші орын үшін өткен ойында Ұлжан мен Әл-Хамид мешітінің футболшылары кездесіп, 3:1 есебімен Медеу ауданының мешіті жеңіске жетті. Ақтық бәсекеде Қалқаман және Төле би ұжымдары жолықты. Тартысты өткен шешуші ойында Алмалы ауданы 4:2 есебімен жеңіске жетті.

«Біз осы турнирді жеңіп алғанымызға қуаныштымыз. Барлығы да жоғары деңгейде өтті. Алдағы уақытта осындай жарыстар жиі болып тұрса жақсы болар еді. Біз өзіміз футболды жиі ойнап тұрамыз», - деді «Төле би» командасының ойыншысы Данияр Сахи.

Жеңімпаздар мен жүлдегерлер кубок, медаль және дипломдармен марапатталып, бағалы сыйлықтарға ие болды. Ал, бірінші орын алған командаға 1 млн теңге сыйақы табысталды.

«Асыл мұра» бағдарламасы мешітке келуші жамағаттар арасында бұқаралық спортты дамыту мақсатында жүзеге асырылған.