Зиратқа қойылған гүлдерді жымқырып, қайта сататын ұры ұсталды

Петропавл қаласының полиция бөлімінің қызметкерлері зираттарға қойылған гүлдерді жымқырған 37 жастағы ұрыны қолға түсірді, деп хабарлайды ҚазАқпарат Солтүстік Қазақстан облысы ІІД баспасөз қызметіне сілтеме жасап.

«Өз аумағын тексеріп жүрген күзетші зират маңында беймезгіл уақытта ВАЗ-2109 автокөлігін көріп, тәртіп сақшыларын шақырған. Бұл дабылды тәртіп сақшылары бұрыннан күткен еді. Себебі, гүлдестелердің (венок) жоғалатыны туралы арыздар жаздан бері түсіп келген. Гүлдестелері қайта саудаға шығарылатыны туралы нұсқа бар еді. Күдікті ұсталған уақытта «бәрі қоқыста жатты, мен ұрлаған жоқпын» деген уәж айтты. Алайда көліктегі жаңа гүлдестелердің неліктен жиналғанын түсіндіріп бере алмады», — деп хабарлайды ведомстводан. Күдіктінің «бизнесінің» мән-жайын тәртіп сақшылары анықтап жатыр. Қазіргі уақытта аталған факт бойынша ҚР ҚК-нің 188-бабы 1-бөлігі бойынша (ұрлық) қылмыстық іс қозғалған. Күдіктінің кінәсі дәлелденсе, ол 3 жылға дейін бас бостандығынан айырылуы мүмкін.