Нұрсұлтан Назарбаев: Оңтүстік өңірдің тарихы – тұтас Қазақстанның тарихы

   

Өткен аптада жұмыс сапарымен Оңтүстік Қазақстан облысына барған Елбасы Нұрсұлтан Назарбаев өңір жұртшылығымен кездесті. Жүздесу барысында өңірдің бірегей тарихына және мәдени ерекшелігіне тоқталды.

«Оңтүстік Қазақстан –қазақы­лықтың қаймағы бұзылмаған өлке. Бұл – абыздар мен әулиелердің қасиеті дарыған, Қожа Ахмет Яссауи мен Әл-Фарабидің ізі қалған, көне мәдени мұраға бай киелі жер. Қазір бұл өңірде бүкіл ел халқының 16%-ы тұрады, – деді Нұрсұлтан Назарбаев. Қазақстан Президенті оңтүстік өңірдің тарихын тұтас Қазақстанның тарихы деуге болатынын атап өтті. «Оңтүстік Қазақстан облысының өзінде 800-ден астам тарихи-мәдени ескерткіш бар. Әлемге әйгілі жәдігерлеріміздің көпшілігі осында. Түркістан, Отырар, Сайрам, Сауран қалалары, Қожа Ахмет Яссауи, Арыстан баб кесенелері – біздің мақтанышымыз. Осындағы әрбір төбе мен қырқаның, өзен мен көлдің аттары – тұнып тұрған тарих. Мәртөбе, Күлтөбе және Ордабасы – халқымыздың сақталуына әсер еткен қазақтың бірлігі мен тұтастығының қасиетті символы. Біз осының бәрін ұрпақтың санасына сіңіруіміз керек. Жастарды патриотизмге, отаншылдыққа, туған жерді сүюге баулу қажет», – деді Ел Президенті. Сонымен қатар, Нұрсұлтан Назарбаев бүгінде қоғамда қызу талқы­ла­нып жатқан үштілділік мәселесіне де баса назар аударып, әліпбиді ауыстыруға қатысты көпшіліктің көкейіндегі күмәнді сейілтті. «Ағылшын тілін оқыту­ды жандандыру қажет, ол іскерлік ортаның барлық саласында қолданылатын болады. Бұл – заман талабы», – деді Елбасы. Кездесу барысында Қазақстан Президенті облыстың дамуындағы бірқатар проблемалық мәселелерге тоқталды. qazaquni.kz