Жаңа жылды қалай қарсы аласыз?

4
7418

Дос КӨШІМ, саясаткер, «Ұлт тағдыры» республикалық қозғалысының төрағасы:

Жаңа жылды үйде тойлаймын. Меніңше, бұл мереке отбасылық мереке. Сондықтан да, үй-ішіміз жиналып, әдемі дастархан жайып, бас қосамыз. Жалпы қазақтың жаңа жылы – наурыз. Ал біздің тойлағалы отырған қыстағы наурызымыз күнтізбелік жаңа жыл. Барлық елдер дәл осы күні ескі жылмен қоштасып, сандық жағынан келесі жылға ауысады. Яғни белгілі бір жылдың бітуі. Сондықтан, қалыптасқан дәстүр бойынша тойлаймыз. Бірақ оны үлкен той ретінде өткізбейміз. Бұл жылда әрқайсымыздың арман-тілегіміз орындалса екен деймін. Қазақ елінің болашағы, дамуы біздің алаш азаматтырының ойлаған тілектерімен үндесіп, бірлікте болса екен деймін. Сосын, әрине, әрбір қазақ жерінде тұратын барлық халықтың әрқайсысының бастарына денсаулық, байлық тілеймін!

Әлихан БӘЙМЕНОВ,

«Ақ жол» партиясының төрағасы:

Негізі бұл мейрамды әрқалай тойлаймын. Былтыр Бурабайда болдым. Бұл мейрам қазір діни сипатынан айрылған. Кезінде ағылшын елінде орта ғасырларда діннің тазалығы үшін күресетін пулитандар деген топ болған. Бұл мейрамды мерекелемеу керек деп өз көзқарастарын айқындаған. Ал, қазір барлық елдердің жыл санауының өзгеруіне байланысты ол бізге әсер етеді. Бұлар шартты дүниелер. Оған адамның туған күні де кіреді. Баяғыда қазақтар жыл санауды тек наурызбен ғана өлшеп, күн жылығанда жаңа жылдың басы деп білсе, қазір де әлем болып жылдың басын бекіткен бірінші қаңтар күнін біз де тойлауымыз керек. Бұл күннен барлық адам баласы тек жақсылық күтеді. Сондықтан, бірінші тілерім, әркімнің өзінің межелеген биігі бар, орындалса дейтін арманы бар, сол армандарыңызға жетіңіздер, жаңа биіктерді бағындырыңыздар. Әркімнің адами, адамзаттық бақыт деген өлшемі болады, соның өлшемі бойынша әркім де өз бақытына жетсін. Еліміз тыныш болсын. Әрқайсымыздың отбасымызда береке-бірлік, сенім мен махаббат болсын. Жақын адамдарымыз аман болсын. Жаңа жыл табыстан табысқа жететін жыл болсын.

Темірхан МЕДЕТБЕК, мемлекеттік сыйлықтың иегері, ақын:

Жаңа жылды отбасыммен, үйде қарсы аламын. Қазір де жаңа жыл туралы көптеген пікірлер айтылып жатыр ғой, меніңше, мұны саясаттандырудың қажеті жоқ. Бұл кәнігі мейрам. Сондықтан да теріс жағын ашып, белгілі бір топтардың мүддесі деп қарау керек емес. Келесі жылы қоян жылы қазақта әрқашан да қиын болады. Қиындықты жеңер, рухани қуатымызды күшейтетін жыл болсын. Артымыздағы жастар ізімізді бассын, жақсы жаңалықтарға толы жыл болсын. Жастарымыз бар болсын, шетінен нар болсын дегім келеді.

Асылы ОСМАН,

тіл жанашыры:

Біз негізі бұл мейрамды Кеңес өкіметі тұсынан бері жетпіс жыл бойы тойлап келдік. Ендігіде, тәуелсіздігімізді алғалы өз басым тойламаймын. Шақырған жерге барып, көңіл қалдырмауға тырысам. Дегенмен, бұл мейрамды тойлауға қарсымын. Бұл түнде теледидардан түрлі бағдарламаларды көріп, үйде отырғанды ұнатамын. Бірақ арнайы үйге шырша қойып, үлкен мереке етіп өткізген емеспін. Жетпіс жыл тойлап келген мерекеміз ғой. Сонымыздан арыла алмай жүрміз. Тәуелсіздігімізді жақсылап тойлағанымыз дұрыс. Себебі жаңа жылдың көлеңкесінде қалып қойғандай әсер етеді. Өзіңіз сұрағаннан кейін, құттықтауымды айтайын, бұл мереке барша қазақстандықтарға бақыт әкелсін. Бойдағы қуаныш жаңа жылда өздеріне серік болсын. Баянды бақыт, тыныштық, бірлік, достық, туыстық, сыйластығымыз тәуелсіздігімізге нағыз тірек болсын! Мықты денсаулық, ұзақ ғұмыр, татулық тілеймін.

Хайролла ҒАБЖАЛИЛОВ,

«Алаш» тарихи зерттеу орталығының президенті:

Бұл мерекені шампан ашып, кәдімгідей бір дүркіретіп тойламаймын. Міндетті түрде сағат тілінің он екіге баруын күтіп, бір ғажап дүние бола қалатындай етіп қабылдамаймын. Тек отбасымызбен теледидардан осы түні берілетін бағдарламаларды көріп, дастархан басына жиналамыз. Бұл жаңа жылды бүкіл әлем тойлап жатыр. Сондықтан бұған тыйым салмау керек деп ойлаймын. Бізде фанатизм бар. Бізге негізі өмірге реалды тұрғыда қарау керек. Жақында бір жерде шырша мерекесін тойламау керек деп уағыз айтып жатыр екен. Құлшылық пен мерекені ажырату керек. Мысалға, мешіттің алдына барып, шырша қойып, соған құлшылық жасап жатса, ол басқа әңгіме болар еді. Ал шырша мерекесіне ешкім құлшылық жасап жатқан жоқ қой. Әлі де осы мәселеге зер салып қарауымыз керек. Ислам дінінде туған күнді де атауға болмайды делінеді. Неге? Мен бір жыл өмір сүрдім бе, олай болса, өзіме-өзім есеп беруім керек. Өткен жолды еске алып, салауат айтып, келер күнге бағыт жасап отырамын. Сол секілді, өткен жыл бізге несімен ерекшеленді, келер жылға бағытымыз қандай, міне, осы мәселені қарау керек деп ойлаймын. Мысалы Қазақстан саясатын алайық. Біреулер жуырда өткен саммитті сынап жатыр. Меніңше, ол дұрыс. Ол – сыртқы саясатымыздың мықтылығы, беріктігі. Мен жақында Құрама Штаттарда болып келдім. Барлығы да елбасымызды мойындап жатыр. Әрине, кемшін тұстарымыз да бар, ол мейлі ішкі саясатта болсын, мейлі басқада болсын, бірақ бұлардың бәріне үстірт қарай беретін болсақ, қиынға тап болатын секілдіміз.

Тілегімді айтар болсам, келесі жылы елімізде Азиада болайын деп жатыр, міне, сол жарысқа қатысушыларға сәттілік тілеймін. Жаңа жыл бізге құт-береке алып келсін. Халқымыз бірлікте болып, жастарымыз аман болсын. Алладан ұрпағымызға жақсы тәрбие нәсіп болсын.

Әзімбай ҒАЛИ,

саясаткер:

Жаңа жылды үйде қарсы аламыз. Дастархан жайып, ет асамыз. Туысқандарымызбен, балаларымызбен, достармен бас қосамыз. Ал, менің ойымша, «рождество» мерекесін тойламау керек. Қазір де көп жерлерде қаптап кеткен шырша тойы болмау керек сияқты. Біздің жаңа жыл, әрине, наурызда. Мұны пәлендей үлкен мейрам деп есептемесем де, жақын адамдарымызды құттықтау жөн. Бірақ бұл жаңа жылдың бір мәні, әркім де өткен жылда өзіне не бітірдім деп есеп беру керек деп ойлаймын.

Еліміз аман болсын. Жұмыс бабымыздан, қызметімізден айрылмайық, жұмыссыздар жұмыс тапсын деген ниетім бар. Себебі бұл ең үлкен мәселе. Кәсіп алға жылжысын. Әрбір жанға тіршілік көзі ашылсын. Денсаулығымыз жақсы болсын!

Ардақ ҚҰЛТАЙ

4 ПІКІРЛЕР

  1. менимше букил алем тойлап жатканнан кейн бизде тойлаганымыз дурыс сиякты кишкентайлар асыга кутетин мейрам гой олар перште

  2. ЖАҢА ЖЫЛ БІЗГЕ НЕ БЕРЕДІ?
    немесе өзгенің сойылын соғу
    Құрлысшымын десең құрлыстан, инжинермін десең техникадан, зергермін десең зергерліктен қысқаша айтқанда қандай кәсіппен айналыссаңыз да сол мамандықты жете меңгеру шарт болғандай, өзімізді мұсылманмын десек сол атқа лайықты әрекетті жасау біздің басты міндетіміз. Мұсылман болып Аллаһқа мойынсұнған соң Аллаһ сүймейтін нәрселерден бойымызды аулақ ұстауымыз тиіс. Осы тұста қандай әрекеттерді Аллаһ сүймейді? деп сұрарыңыз заңды.
    Мәселен, алда келе жатқан жаңа жыл қандай мейрам? Ол жайлы Ислам не дейді? Оны тойлаудың мұсылманшылығымызға кері әсері бар ма? Жаңа жылды алаңсыз тойлап жүрсіз бе, ақырым не болады деп ойлап жүрсіз бе? Міне осы мәселеде ақ пен қараның арасын дұрыс ажырата алмасақ, тура жолдан жырақтап, басың қайда дегенге құлақ көрсетуіміз ғажап емес. Сізге ұсынылған заттың іші жылтыр, адам қызығарлық болып көрінгенімен, іші сасық, құбыжық болмасына кім кепіл. Ал енді осы мәселені қолдан келгенше тарқатып айтып көрелік:
    Жаңа жыл – Христиандардың хазіреті Исаның туған күні деп тойлайтын мейрамы (Рождество). Христиандардың сенімі бойынша хазіреті Исаның туған күні 25 желтоқсанға сәйкес келеді.
    Ал Батыс әлемінде Жаңа жыл 354 жылдан бері тойланып келеді. Хазіреті Исаның туған күнін 6 қаңтар деп тойлап жүрген Шығыстағы христиандар болса, Ионес Христомос пен Григори деген қасиетті әкейлердің бастамасымен жаңа жылды тойлайтын күнді батыстағылармен бірдей етіп 25 желтоқсанға ауыстырды. Міне Жаңа жылдың тарихы қайда барып тірелігі тұрғанын қараңыз. Негізі христиандардан шығып отыр. Сіз, біз жаңа жыл болғаны үшін ғана тойлаймыз, мұнда ниет дұрыс болса болды ғой деуіңіз де мүмкін. Егер солай дейтін болсаңыз, мен арақты жақсы ниетпен ішіп отырмын ғой дегенге саяды. Мұнда ең маңызды мәселе осы мейрамды христиандардың белгілеп беріп отырғанында. Пайғамбарымыз (с.а.у.): «Кімде-кім бір қауымның әрекетін істейтін болса, ол сол қауымнан болып есептеледі», – деген.
    ШЫРША ҚАЙДАН ШЫҚТЫ?
    Христиандарда шырша безендіру үрдісі болмаған. Христиандардың жаңа жылда безендіріп жүрген арша ағашы алғаш рет 1605 жылы Германияда қолданыла бастады. Кейіннен XIX ғасырдың орта шенінде Францияға да өтті. Армяндардың сенімі бойынша жаңа жылдың тәңірі Аманор деп аталды. Пагандықтың дәуірінде ауланған аңдар Аманордың құрметі үшін арша ағашына ілінетін болған. Жаңа жылда әртүрлі әсем бұйымдармен безендірілу арқылы өтетін бұл үрдіс пагандықтардан христиандыққа осылай өткен. Шырша – өзін Құдаймын деп жариаға жар салып, дүниеден озған Нәмрут патшаның белгісі. Нәмрутқа табынушылар біздің Тәңіріміз мәңгі тірі деп жыл он екі ай бойы жап жасыл кейпін өзгертпейтін шыршаға теңеген. Сондықтан шыршаны, айналғанда өзгелердің Тәңірлерін айналшықтап жүретініңізді ұмытпаңыз. Римдегі пұтқа табынушылар: «Егер кімде-кім өз үйінде қысты күні лавр ағашын әсемдеп қойса, ол үйден еш уақытта бақыт кетпейді» деген сенімде болған. Міне сіз де дәл осы сенімде болсаңыз иманыңыздан айырылып Аллаһтың азабына лайықтылардың біреуі болып шығасыз.
    АЯЗ АТА
    Аяз ата – Люклю өңірінің бас епископы болған Сантоклаустың еңбегін бағалауынан бастау алады. Христиандардың сенімі бойынша әрдайым күлімсіреп, адамдарға қолғабыс таныту жағымен танымал болған Аяз ата, қазіргі христиандардың мәдениетіне сіңісіп кеткен. Сантоклаус адамдарды қорғайтын қайырымды жан болып табылады. Жаңа жылда балалардың көңілін көтеретін ақсақал.
    Мұның астарында да үлкен саясат жатыр. Жас бүлдіршіндердің ақ парақтай таза санасы мен кіршіксіз – жүрегінен орын алып, жастай уландыру. Бейкүнә бала Мұсылманшылықтан ұзақ қалып, өзге діннің дәстүрін жаңғыртып жүргенінен хабарсыз күйде қала береді.
    Жаңа жылды тойлаудың адамға тигізер зияны шаш етектен.
    Бірінші, сізді сеніміңізден айырып, өзге діннің дәстүрін уағыздауға үгіттейді. Яғни Исламға қайшы әрекет істейсіз. Ең сорақысы осы болса керек. Өйткені шындықтың тамырына балта шауып, өтіріктің сойылын соғасыз. Яғни Аллаһқа серік қосып, кешірілмес күнәға бой алдырасыз.
    Екінші, қанша шығын, ысырапқа жол ашады. Ал Құранда Аллаһ Тағала ысырап етушілерді сүймейтіндігі баяндалған. Бұл тағы да Аллаһқа қарсы істелген шараңыз болып қала береді. Болмашы жылтырақтармен өз-өзіңізді алдап, от шашатын (салют) құралдарға қыруар қаржы жұмсайсыз. Осылайша өзгенің түкке тұрғысыз дүниесін аласыз. Олар сізді ақымақ қылып қалтасын томпайтып кете барады. Сондай-ақ осы ойыншықтар қанша жасөспірімдерді он екі мүшесінен айырып, жарымжанға айналдырады.
    Үшінші, ішімдік атаулының қып-қызыл саудасы жүреді. Бұл күні көңіл көтерудің төте жолы осы тентек суға барып тіреліп тұрады. Осылайша тағы да Аллаһтың тыйым салған ішімдігін ішіп, қарсылығыңызды көрсетіп шыға келесіз.
    Төртінші, үнділер айтпақшы, «Арақ ішкенде адам әуелі туыс боп сыланып, сұлуланып, байпаңдайды. Одан кейін маймыл болып ойнақыланып, қылжақтайды. Содан соң кәрлі арыстан болып қоқияды. Ең ақыры шошқа болып тынады». Міне мұндай халге түскен адам жанұясының шырқын бұзып, өзгелерді ренжітеді де ақыретте жауап беретін тағы бір істі мойнына арқалап алады.
    Бесінші, қыз-қырқындар дәл осы күні абыройынан айырылып орны толмас өкінішке душар болса, қаншама адамдар пышаққа ілініп аурухананың терінен шығады. Сенбесеңіз бірінші қаңтар күнгі теледидарға жаңалықтар легіне көз салыңыз.
    Алтыншы, сіздің бар назарыңызды осы бір жалған мейрамға аудартып, өмірлік негізгі мақсатыңызды ұмыттырады. Өз-өзіңізді «мұндай мейрам күніне келіп жатқан жоқ», «жаңа жыл күні қандай болсаң жыл бойы сондай болып жүресің» деп Исламға сай келмейтін неше түрлі негізсіз ырымдармен, өзіңізді де өзгелерді де алдап соғасыз. Міне, нағыз өтірік. Бұл үшін жауап бересіз.
    Жетінші, қаншама оқу орындары мен мекемелер безендірілуі тағы бар. Бұл да қыруар ақшаны талап етеді. Дәл соған кеткен қаржыға жетімнің халін сұрап, көңілін ауласаңыз болмас па еді?
    Сегізінші, мейрамнан кейінгі жағдайды бір көріңізші. Жаңағы сәнделген жылтырақтардың барлығы шашылып қала береді. Алаңдарда атылған от шашарлардың қалдықтары саңырау құлақша самсып жатады. Бұл да біреуге жұмыс. Оны жинайтын адам неше түрлі қарғыс айтып, жеті атаңа жеткізіп асырады. Міне өтіріктің барлық жері былғаныш болады. Басынан соңына дейін. Мұның жамандығын, тізе берсең соңына жете алмайсың. Сондықтан Аллаһтың мына бір бұйрығына құлақ салып, одан берік ұстанғанымыз жөн: «Олар (мүмин-мұсылмандар) өтірікке айғақ болмайды да бос (пайдасыз) сөздерге кездессе көңіл аудармай өте шығады» (Фұрқан 25/72).
    Файзулла ТАЙТЕЛИЕВ

    Жаңа жыл мен рождествоны тойлауға болады ма?
    Төл тарихымыздан тағлым алар болсақ, Атырау мен Еділдің, Алтай мен Алатаудың арасын алып жатқан сайын даланы білектің күшімен, найзаның ұшымен сақтап, қорғап қалған. Ұрпағына аманаттаған батыр бабаларымыздың өнегесінен өзгеге еліктеуді, жат қылықты әдетке айналдыруды байқамайсың. Қайта оларды осындай жанқиярлық іс әрекетке итермелеген имандары неткен кәміл деген ойға шомасың. Ал қазіргі адамдарды олардың нағыз ұрпақтары деуге келе ме?
    Бүгінгі күнде көптеген мұсылмандар басқа діндегілердің мерекелерін атап өту құмарлығына бой беріп жатыр және бұндай амалдардың өздеріне қаншалықты көп жәбір келтіретінін түсінбейді.

    Рождество Христово және жаңа жылдың шығу тарихы.
    Құрметті менің баурым, Рождество мерекесінің түпкі тамыры христиандық емес екенін білгенің абзал.
    Рим империясында көпқұдайшылдар өздері жартылай құдай жартылай адам деп табынатын Митраның туған күнін (Рождествосын) сән-салтанатпен атап өтетін болған. Олардың жалған діні бойынша Митра 25 желтоқсан күні бір үнгірде жануарлар арасында туған. Тура осы сияқты славяндар да христиан дінін қабылдаудан бұрын көп жалған құдайларының біреуі болған Коляданың Рождествосын тойлаған (олардың Рождествода айтатын әндері бүгін де «колядки» деп аталады). Ел арасында кең тараған бұл мерекені ығыстырып тастау үшін ІҮ-ғасырда бұрын сол Митраның бас табынушысы болған, кейіннен христиан дінін жаңадан қабылдаған Византия империясының императоры Константин 25-желтоқсанды Иисустың (Иса а.с.) туған күні деп жариялаған. Оған дейін Исаға тиісті бұндай атаулы күнді ешкім білмеген де, тойламаған да.

    Көпқұдайшыл болған римдіктердің сенімі бойынша, егер адам өз үйіне лавр (үнемі жасыл болып өсетін ағаштың бір түрі) ағашын тігіп қойса, онда оның үйінен көктем кетпейді мыс. Сондықтан да олар сол ағашты өз үйлеріне әр қыс келген сайын тігіп қоятын болған. Герман тайпалары да солай істейтін болған, бірақ лаврдың орнына олар ель (шырша) ағашын тігетін болған. Көріп тұрғанымыздай, бұл да Иса (алехи салям) ға және оның Рождествосына қатысы жоқ .

    Христиандарға ұқсау

    Олар (Мейірімді Аллаһтың құлдары) өтірікке айғақ болмайды… (Құран кәрім, 25:72)
    Бұл аяттың тафсирілерінің бірінде, басқа діндегілердің діни мерекелерінде болып қатысу туралы айтылған деп келтіріледі.
    Бүгінгі күндерін ақтай келе, адамдар: «Мерекелерде ешбір тыйым салынған нәрсе жоқ», немесе «Біз бұл мерекеге барғанда тыйым салынған барлық нәрседен тыйыламыз (арақ-шарап ішпейміз, тек қана дастарған жайып атап өтеміз)», – дейді. Көп жағдайда христиандардың Кітап иелері болғандықтан мұсылмандарға жақын екендігі де жиі айтылады. Пайғамбарымыз саллалаху алейхи уассалямның: «Кім қай халыққа ұқсағысы келсе, ол солардың бірі», – дегеніне сүйенсек, бұған қандай рұқсат болуы мүмкін?

    Алланың елшісі (с.а.с.) айтқан екен: «Сендер міндетті түрде өздеріңнен бұрын өткендердің (яхудий мен христиандардың) ізімен жүресіңдер, тіпті олар кесірткенің ініне кірсе де, сендер оларға ілесе кетесіңдер».

    Абзалын алайық

    Егер Аллаһ бізге бір нәрсеге тыйым салса, міндетті түрде одан абзалын береді. Алланың елшісі (с.а.с) былай деді: «Аллаһ оларды сендер үшін олардан да абзал болған Құрбан және Рамазан айт күндерімен алмастырды». Аллаһ тек қана шындықты айтады. Бүкіл жаратылыстың Раббысы осы екі күнді ең абзал күндер деп атаған екен, ой-санасы түзу, Аллаға және оның пайғамбарына иман келтірген адам бұны қабылдайды да , қалғандарын тастайды.

    Мусылмандар Аллаға иман келтірмегендердің мерекелерін тойлап, өз мерекелерін ұмытса, онда олар мұсылмандардың жамағатынан алыстап кетеді, және сол имансыздардың әлеміне жақын болады. Бірде-бір христианның, олар мұсылман мемлекетінде өмір сүріп жатса да, Құрбан айтты немесе Рамазан айтты атап өтіп жатқанын көрдіңіз дер ме? Ал не үшін біз – мұсылмандар, Аллаһтын дінінде екенімізді ұмытып, оларға ілесуіміз керек?

    Бұл мерекені атап өтушілер өздерінің сөздерінде бұл мерекені олардың әкелері атап өткендігін, және олар сол ата дәстүрді жалғастырушылар екендігін жиі келтіреді. Бірақ Аллаһ оларға Құранда былай деп тікелей жауап береді:

    \»Алла түсірген (Құранға) бой ұсыныңдар делінсе олар: «Жоқ, үстінде ата-бабаларымызды тапқан жолға ілесеміз» деді. Егер аталары еш нәрсені түсінбеген әрі тура жолда болмаған болса да ма?» (Сонда да солардың жолымен жүре ме?) (Құран, 2:170)

    Бауырым, Аллаһқа және оның соңғы пайғамбарына иман келтірмегендер, біздің де соларға ұқсауымызды, Аллаһтың бекіткен заңдарына мойынсұнбауымызды қатты қалайтынын біл:

    \»Олар, өздері қарсы болғандай сендердің де қарсы болып, бірдей болуларыңды қалайды» (Құран, 4:89)

    Тағы бір қасиетті аятында Аллаһ бізге былай деп әмір етеді:
    \»Сендерге Пайғамбар не берсе алыңдар да неменеден тыйса, одан тыйылыңдар әрі Алладан қорқыңдар. Сөзсіз Алла, қатты азап иесі». (Құран,59:7)

    Айналайын досым! Мүмкін сіз менің әкеммен үзеңкілес, немесе өзіммен қатар болмаса қара көз қарындасым, өкшемді басар інім шығарсыз. Тарихтың қай бетін парақтасаңызда арғысы сонау Абылайхан, Бөгенбайлар, Төле би, Қазыбек би және Әйтеке билер мен бергісі Ыбырай мен Абайлар християндардың рождествосында үйіне шырша тігіп, балаларымен немерелерін: «Санта-клаус келеді, бізге сыйлық береді. Бір қолында шикалад, бір қолында мармелад», – деп алдамаған. Аллаһқа ғана шын тәуекел етіп, Одан ғана береке тілеуді үйреткен. Сондай ұлы иманды аталарымыздан имандылық пен ибалылықты, арлылық пен намысқойлықты үйренсек болмас па еді?

    Аллаһтың және Оның Елшісі бергенді алып, тыйым салғанынан тыйылайық!
    Әлемдердің Раббысы, Аллаһқа мадақ, Аллаһтың елшілеріне Аллаһтың сәлемі және жарылқауы болсын!

    Авторы: Әбдірахман МҮСЛІМ (тілші)

Пікір жазу

Пікіріңізді енгізіңіз!
мұнда сіздің атыңызды енгізіңіз