Шоколад қабында мемлекеттік туды бейнелеу дұрыс па?!.
2015 ж. 09 қазан
5781
0
Қазақстандық тәтті құмарлар шоколад қабындағы мемлекеттік тудың суретіне лайықты құрмет көрсетпейді деп мәлімдеді сенатор Сәрсенбай Еңсегенов.
Фото: russian.eurasianet.org
Сенаттың пленарлық отырысында сөз сөйлеген Сәрсенбай Еңсегенов мемлекеттік рәміздерді пайдаланатындарға көңілі толмайтынын жеткізді.
“Мыңдаған кішкентай жалаулар іс-шараларда қолданылады. Кейін оны адамдар таптап, қоқыс жәшігіне лақтырады. Тағам өнімдерінің қабына да мемлекеттік рәміздер пайдаланылады”, – дейді сенатор.
Оған жауап ретінде Мәдениет және спорт вице-министрі Марат Әзілханов басын шайқаумен болды:
“Біз тәрбиелік жұмыстар жүргізуіміз керек. Адамдардың сана-сезімін жоғарылату қажет”, – дейді ол.
Еске салсақ, Қазақстандағы мемлекеттік рәміздерді құрметтемейтіндерге 2 АЕК мөлшерінде айыппұл қарастырылған. Одан бөлек қоғамдық жұмыстарға тартудан бастап, 2 жылға дейін бас бостандығынан айыру жазасы да тағайындалуы мүмкін.
