Елімізде шенеуніктердің жұбайларының есепшоты жіті тексерілетін болады

Қалталы мен қарапайым қарашаның тапқаны елге бүкпесіз жария етіледі. Тіптен олардың жұбайларының есепшоттарындағы қаржылары жіті тексеріледі.

Бұл – 2016 жылдан бастап қолға алынатын басты бастаманың бірі. Келер жылдан бастап мансабы биіктердің кірісі елге жария етіледі. Депуттар мен соттар, әкімдер мен ұлттық компания өкілдерінің айлығы мен басқа да кірістері жіті тексеріледі. Тіптен шенділердің жұбайларының шоттары да май шаммен қаралады. Мұны Қаржы министрі Бақыт Сұлтанов шегелеп айтты. Ал, 2020 жылға қарай қарапайым елдің тапқаны тексеріледі. Бас-аяғы 4 жылда 8 миллион адамның табысы санақтан өткізілмек. 8 сағатқа созылған пленарлық отырыстың ең тартысты тақырыбы халықты міндетті медициналық сақтандыру мәселесі болды. Заңға сәйкес, 2017 жылдан бастап әр жұмыс беруші еңбекақының 2 пайызын сақтандыру қорына аударып отыруы тиіс. Ал, екі қолға бір күрек таппай жүргендерге мемлекет төлейді. Айта кету керек, бір жыл бойы дәрігер көмегіне жүгінбегендер де міндетті жарнаны төлеулері шарт. «Мемлекет 8,1 миллион адамға міндетті жарна төлейтін болады. Балалар, студенттер, содан кейін қария азаматтар, мүгедек азаматтар, жұмыссыз азаматтар да бар»,- деді Денсаулық сақтау және әлеуметтік даму министрі Тамара Дүйсенова.