2015 жылы мемлекеттік білім беру жинақтау жүйесіне қатысушы банктердің қатары көбеймек. Осылай деп, «Қаржы орталығы» АҚ президенті Рамазан Әлімқұлов мәлімдеді.
Айтуынша, қазір бірқатар банктермен алдын ала уағдаластық бар. Айта өтейік, жинақтау жүйесі елбасы Нұрсұлтан Назарбаевтың бастамасымен 2013 жылы заңды іске асты.
Бұл депозиттің өзгелерден артықшылықтары көп. Салымшыға 8% -дан 10%-ға дейінгі мөлшерде банк сыйақысы беріледі. Бұдан бөлек 5%-дан 7%-ға дейінгі мөлшерде мемлекет сыйлықақысы да есептеледі.
Жетім балалар, мүгедек балалар, аз қамтамасыз етілген отбасылардан шыққан балалар және көп балалы отбасылардан шыққан балаларға басымдылық беріледі. Олар мемлекет сыйлықақысын 7% мөлшерде алады.
Бүгінгі таңда білім беру жинақтау депозитін төрт банкте: «Темірбанк», «БТА Банк», «Халық банк» және «Цеснабанкте» ашуға болады. Айта өтейік, мемлекеттік білім беру жинақтау жүйесінің көмегімен тұрғындар өздерінің білім алуға шығыстарын, жоқ дегенде, 40%-ға қысқарта алады.