Салидат Қайырбекова полицияға құрт ауруына шалдыққандарды іздеуді тапсырмақ

"Құрт ауруына шалдыққандарды полиция іздеуі тиіс. Денсаулық сақтау министрі Салидат Қайырбекова ел арасындағы туберкулездерді іздеуге Ішкі істер министрлігі көмек беруі керек деді" деп хабарлайды КТК арнасы. Туберкулездің ашық түрі ауыр науқасқа жатады. Сондықтан, ондай науқастардан қоғамға қауіп зор. Заң жүзінде, құрт ауруымен ашық түрде ауырғандар оқшау емделуі тиіс. Алайда, кейбір науқастар емдеу орталықтарынан қашып, қоғамдық көліктерде емін-еркін серуендеп жүр. Министр мұндай адамдарды полицейлер қатаң назарға алсын деп отыр. Өйткені, дәрігерлер қашқан науқасты іздей алмайтыны тағы бар. Ал, туберкулезге шалдыққандардың басым бөлігі бұрын істі болғандар мен үй-күйсіз азаматтар. Мамандар мұндай адамдардың қолдарында құжаты жоқ болғандықтан емдеуге де ала алмаймыз дейді. Ал, бюджеттен 1 адамды ұзақ мерзімге жатқызып емдеу үшін жылына миллион теңге жұмсалады екен. NUR.KZ