Елімізге Қытайдан "Легалка" атты есірткінің жаңа түрі әкелінуде

Елімізде соңғы үш жылдан бері есірткінің жаңа түрі кең таралуда. Нашақорлар арасында "Легалка" деп аталатын бұл "тауар", әсіресе, Алматыда сұранысқа ие. Нарколог-дәрігерлер бұл есірткіге құмар жастардың жыл санап артып келе жатқанын айтады. Тіпті марихуана мен героинді тұтынатын нашақорлар соңғы уақытта жаппай "Легалкаға" көшкен. Ал Қытайдан келетін есірткінің осы түрі басқаларынан 5-6 есе зиян дейді мамандар. "Бір екі шеккеннен кейін ауытқулар пайда болады. Науқастар өзіне лайық емес іс-әрекеттер жасайды. Мысалы терезеден секіріп кетеді, өз-өзіне қол жұмсайды. Біздің клиникада бір ер бала болған, өзінің анасының көйлегін киіп далада жүреді. Бірдеңе десең алақ-жұлақ етіп, шөпке тығылып өзін жануар сияқты ұстайды", - дейді нарколог-дәрігер Айгүл Ембергенова. Елімізде есірткінің жаңа түрін қолданатындар негізінен алматылық жастар екен. Оны пайдаланған нашақордан наркологиялық сынама алсаң да, есірткі шеккенін дәлелдей алмайсың дейді дәрігерлер. Сондай-ақ, "Легалканы" заңды деп ұғатындар да аз емес. Алайда оны пайдалануға кез-келген есірткі түрі сиякты заң бойынша тыйым салынған. NUR.KZ